Гъябгъюрайи йисан, коронавирусдин тIягъвнихъди аьлакьалу вуди арайиз гъафи читинвалариз дилигди, республикайин 39 муниципалитетдиан вуйи уьмуми образованиейин 136 мектебдин иштирак’валиинди «100 мектеб» проект уьмрин гьяятдиз адабгъура. Думу метлебариз республикайин бюджетдиан – 270 млн манат, ерли бюджетариан – 29,5 млн манат жара дапIна, мидланра гъайри, бюджетдиан дару, яна инвесторарин терефнаан – 77,5 млн манат уч апIуз мумкинвал гъабхьну.
Му мялуматар РД-йин образованиейинна илимдин министр, РД-йин вице-премьер Уммупазиль Уьмаровайи улихьна йигъари РД-йин Правительствойиъ видеойин аьлакьайин къайдайиинди муниципалитетарин главйирихъди кIули гъубху, мектебар урхбан цIийи йисахьна гьязур апIбан ва «100 мектеб» проект уьмриз кечирмиш апIбан месэлйириз бахш дапIнайи совещаниейиъ тувнийи.
Уммупазиль Уьмаровайи, муниципалин образованйирин главйирихьна илтIикIури, урхбан цIийи йис ккебгъайиз вари мектебариъ расвалин ляхнар ккудукIну ккунивал къайд гъапIнийи. Министрин гафариинди, 10-пи августдиз республикайин образованиейин вари идарйир урхбан цIийи йисахьна гьязур хьувал тасдикь апIру саб вуйи реестриз гъадагънади ккунду.
«Гъийин йигълан мина башламиш дапIну, муниципалин образованйириъ «дорожный картйир» тартиб дапIну ккунду. Думу картйириин биналамиш духьну, мектебди цIа кабхъувалихьан, терроризмдихьан ва санитарияйинна эпидемиологияйин хатIасузвалихьан уьрхру уьлч-мйир чарасуз вуди кьабул апIиди. Образованиейин идарйирин вакилари коронавирусдин инфекция каш ахтармиш апIру тестирование гъабхиди. Му тIалабар, мектебаризси, бицIидарин багъаризра кайидар ву», – къайд гъапIну Уммупазиль Уьмаровайи.
Совещаниейиъ мялум гъабхьиганси, саки вари мектебар 20-пи август улубкьайиз урхбан ццийин йисахьна гьязур хьиди. Дурариз бицIидар кьабул апIуз гьязурди айивал тасдикь апIру, тялукь комиссияйин къул дизигнайи акт тувди.
Уммупазиль Уьмарова образованиейин идарйирин категорйирин ва паспортарин месэлайиинра дийигънийи. Гьамусяаьт муниципалин районариъ ва шагьрариъ образованиейин идарйирин хатIазузвал уьбхру паспортар гьязур апIбан ляхин гъябгъюра. 2020-пи йисан июлин 17-пи йигъаз республикайин 2410 образованиейин идарайикан 1961 идарайи (уьмуми кьадарнакан 81%) хатIасузвал уьбхру цирклиан вуйи паспортар цIийи алаъну. Му ляхин 43 муниципалитетдиъ бегьемди тамам дапIна.
РД-йин образованиейинна илимдин министри муниципалитетарин главйирин фикир уьмуми образованиейин идарйириъ гьавайинна манишнан къайда уьбхбан гъурулушдин, штухъди тямин апIбан ва канализацияйин тIалабар уьрхбаз субсидйир жара апIбан программайиина жалб гъапIну.
Думу программайиъ 26 муниципалин образованиейиан 125 мектеб иштирак шула. Улупнайи ляхнариз жара гъапIу дакьатар йишвариина дурукьна.
