Гьаму йигъари Табасаран райондин администрацияйин актовый залиъ райондин Жямяаьтлугъ палатайин нубатнан заседание кIули гъубшну. Серенжемдиъ райондин главайин заместитель Заур Мусаев, райондин депутатарин Собраниейин председатель Аьлимягьямед Къазиев, яшлуйирин Советдин председатель Мирзамягьямед Мягьямедов ва хайлин жара касар иштирак гъахьну.

 

 

Заседаниейиъ удучIвну гъулхдари Жямяаьтлугъ палатайин вакилар чпи жавабдарвал гъабхурайи цирклиъ арайиз дуфнайи месэлйирихъди ва душваъ гъягъюрайи ляхнарихъди таниш гъапIнийи. Чан нубатнаъ райондин Жямяаьтлугъ палатайин экономикайин артмиш’валин, гъулан мяишатдин ва табиаьтдихъди аьлакьалу месэлйириз лигру комиссияйин председатель Кумалат Кумалатовди серенжемдиз уч духьнайидариз райондин гъулан мяишатдикан ктибтну. Дугъан гафариинди, райондин гъулан мяишатдиъ асас вуди артмиш шулайидар тIумутIчивалин, багъманчивалин ва малдарвалин цирклар ву. Гьамусяаьт, райондин жилариин таза тIумтIин багълар итбан бадали, инвесторар жалб апIбан ляхинра жанлуди давам шула.

Кумалат Кумалатовди къайд гъапIганси, райондин гъулан мяишат ужуди артмиш апIбан бадали, сифте жилар мянфяаьтлуди ишлетмиш ва ккадабцIурайи бегьер артухъ дапIну ккунду. Гьаддихъди сабси гьясиллувалин цIийи объектар арццувал, балугъарин мяишатра, теплицйирра ва арфарин мяишатра артмиш апIувал чарасуз лазим ву.

Мидланра гъайри, К.Кумалатовди улупнайи цирклиъ гьял дарапIди гъузнайи месэлйириканра мялуматар тувнийи. Думу месэлйир техника адрувал, арендайиз тувнайи жиларикан мянфяаьт ктабгъуз даршулайивал ву. Кумалат Кумалатовдин фикрариинди, му ляхин дюз алапIбан бадали, гъулан мяишатдин жиларин инвентаризация дубхну, дурар гъуларин поселенйирин хиликкна тувну ккунду. Дидланра савайи, мяишатдин жилар мянфяаьтлуди ишлетмиш апIбан бадали, тялукь уьчмйирра кьабул апIуб лазим ву.