Дагъни гъул Гурихъ советдин дахилнаъ айи гъуларикан саб ву. Гъул бицIиб вушра, душваъ бажаранлу, гъулхъан юкIв убгру касар гизаф а. Гьадму касарин арайиан сар Тюмендиъ яшамиш шулайи Дагъни гъулан агьали Мягьямедов Низамудин Рамазанович ву.
Низамудин Мягьямедов 1978-пи йисан 8-пи ноябриъ Дагъни гъулаъ бабкан гъахьну. Дагъниарин 9 йисандин мектебдиъ урхбалан кьяляхъ, дугъу Гурхъарин кьялан мектеб ккудубкIну.
2001-2006-пи йисари Тюмендин Гьюкуматдин университетдиъ юридический факультетдиъ урхури гъахьну. Университет ккудубкIу жигьил пишекар жюрбежюр ляхнариъ гъилихну.
2015-пи йисан Тюменский областдиъ Нижне-Тавдинский райондин Нижний-Тавда кIуру гъулаъ му касди ИП «Магомедов» кIуру чан хусуси кархана абццну.
Гъулан жямяаьтдиз рякъ-хулин гьякьнаан кюмек апIурза кIури, му касдин гизаф йисар вуйи. Магьа гъи дугъу гъапIу ниятар кIулиз удучIвну. Дагъни гъулаз асфальт улубзуз меценатвал кIул’ина гъадабгъну, му касди чан терефнаан 1 500 000 манатин кюмек гъапIну. Дугъу Дагъни гъулан жямяаьтдиз, варитIан гизаф зегьмет гъизигу касар вуйи райондин депутатарин Собраниейин депутатвалин вазифйир тамам апIури гъахьи Надир Аьбдуллаевдиз, чан машиндихъди рякъихъна лазим вуйи мутмийир – шей’ар хури, рякъ ккебгъхъан мина лихури гъахьи Зейнудин Шябановдиз, рякъярикк цалар ккаъри гъахьи уста Арсен Шябановдиз ва жямяаьт бадали зегьмет гъизигу жара касаризра зурба чухсагъул мялум апIура. Магьа Хючнаан Халагъна гъябгъюрайи рякъи-хъан Дагъниарин гъюлягънакьан 1,5 километр манзилнаъ асфальт улубзну. Багарихьди кимбу жвилли ляхнарра тамам дапIну ккудукIиди.
Му рякъюн подрядчик Табасаран райондин «СЕЗ» МКУ ву. Дурари машинар гъягъру рякъяр тикмиш апIру «Нема» ООО-йихъди йикьрар дапIнайи. Му рякъюн гьязурлугар гъахуз гьеле апрелин вазлиъ хъюгънийи. Магьа саб шубуд йигъандин арайиъ асфальтра улубзну ккудубкIну. Му рякъюн харжарин саб пай меценатди, хъа тмунуб пай – Табасаран райондин администрацияйи кивну.
Ихь ватанагьли Низамудин Рамазановичдиз аьхю чухсагъул пуз ккундузуз, дугъан ужувлан вари ниятар кIулиз удучIври. Гъит гьамцдар игит, ватандихъан юкIв убгру, бажаранвал кайи касар ихь арайиъ артухъ ишри.
