Улубкьурайи 2020-2021-пи цIийи урхбан йис ккебгъайиз, Хив райондин уьмуми образованиейин саки вари мектебариъ, аьдат вуйиганси, расвалин ляхнар кIули гъухну. Гьелелиг бязи йишвариъ улупнайи серенжемар давамра шула.
Райондин образованиейин отделин начальникдин мяишатдин месэл-йириз лигру заместитель Назаряли Назарялиевди къайд гъапIганси, мектебариъ урхбан цIийи йисахьна гьязурлугъ’валин ляхнар гъахбаз хайлин вахт сарф гъапIну, фицики вари уьлкейиъ сикинсузвал ипу COVID-19 уьзур себеб дубхьну, бицIидар хьадукран тятIиларихъан мина хулариъ гъахьну.
«Улупнайи вахтназ Хив райондиъ гьяракатнаъ айи 29 мектебдикан, Зилдккарин бегьем дару ва Кашкент гъуланна Ккугъарин уьмуми образованиейин мектебарилан савайи, саки вари мектебариъ, урхбан цIийи йисахьна гьязур шули, лазим вуйи расвалин ляхнар тамам дапIна. Улупнайи мектебар, дупну ккундуки, лап хатIалу гьялнаъ а: душвариъ расвалин ляхнар гъахбан мянара адар. Му шубби мектебарра 60-пи йисари тикмиш гъапIу сборно-щитовой дараматар ву. Дурар баяр-шубар кьабул апIуз саб гьял гьязур ву, вушра…
«100 мектеб» проектдин дахилнаъди Асккан АрхътIарин мектебдин полар ва манишин тувру гъурулуш капитально рас гъапIну. Дидланра савайи, «Образованиейин ужагъарин аьгьвалат ужу апIбан гьякьнаан» программайин бинайиинди Ляхлаарин мектебдин гъваъ, унчIвар, раккнар, полар гьюдюхбан уьлчмйир кьабул дапIна.
Расвалин ляхнар гъахбалан савайи, къайд апIураза, улупнайи вахтназ ЗахитI гъулаъ республикайин инвестицйирин программайин бинайиинди, 177 урхурайидар кьабул апIру мумкинвалар ади, деврин вари тIалабариз тялукь цIийи мектеб тикмиш апIбан ляхнарра егин еришариинди кIули гъягъюра. Думу мектеб улубкьурайи урхбан йисаз ишлетмиш’вализ тувну ккундийи, амма карантин себеб дубхьну, му ляхинра кьяляхъ гъубзну. Гьякьикьатдиз лигну, думу мектебдиз урхурайидар цIийи йисаз кьабул апIиди.
Мектебарилан савайи, хьадан фаслиъ бицIидарин багъариъ расвалин ляхнар гъахбазра аьхю фикир тувна. Ляхлаарин бицIидарин багъдин тикилишар хатIалу гьялнаъ а. Душваъ расвалин ляхнар гъахбиинди дигиш шлуб фукIара адар. Имбу бахчйириъ бицIидар кьабул апIуз гьязур ву», – кIура Назаряли Назарялиевди.
Шиклиъ: ЗахитI гъулан мектеб.
