Гьаму йигъари Дербент райондин КIежюх гъулаъ рудрарин учIру инфекция тарабгъбан 49 дюшюш гьисабназ гъадагъну. Аьзарлу гъахьидарин арайиъ 39 бицIир а. Аьзарлуйирин аьгьвалат гъагъиб дар, 4 кас, гьадму гьисабнаан шубур бицIир, Дербент шагьрин кьялан больницайиъ ккаъна. Имбуну 45 касди сагъ апIувал амбулаторный къайдайиинди кIули гъабхура.

 

Къайд апIуб лазим вуки, аьзарлу гъахьи 49 касдикан йирхьур кас, медицинайин кюмек ккун апIури, духтрарихьна чпи илтIикIну. Дидин кьяляхъ медицинайин вакилар КIежюх гъулан гьарсаб хизандин раккнарихъна гъягъюри, хизандин вакиларин сагъ’валин аьгьвалат ахтармиш апIбан ляхин гъабхбан натижайиъ имбуну аьзарлуйирра ашкар гъахьну. Думу ляхин гъабхуз медицинайин 44 вакиликан ибарат вуйи 22 бригада тешкил гъапIнийи. Дурарин кюмекниинди КIежюх гъулан 4 агъзуртIан артухъ агьалйирин сагъ’вал ахтармиш апIуз мумкинвал гъабхьну.

Дербент райондиъ арайиз дуфнайи аьгьвалат РД-йин сагъламвал уьбх-бан министр Жамалудин Гьяжиибрагьимовди чан хусуси гюзчиваликкна гъадабгъну. Дугъу КIежюх гъулаз, тешкиллувалинна методикайин ва сагъ апIбанна диагностикайин кюмек тувбан метлеб ади, Республикайин тарагъру уьзрарин центриан (РЦИБ) инфекционист ва эпидемиолог духтрар кIулиъ ади пишекар духтрарин десте гьапIну.

Роспотребнадзорин Дагъ-устандиъ айи Управлениейин сабпи улупбариинди, инфекция тарабгъувалин асас себебси асккан ерийин убхъру шид ишлетмиш апIувал гьисаб дапIна.

13-пи августдиъ КIежюх гъулан кючйириъ, уьзюр тарабгъувалин улихьишв гьадабтIбан бадали РД-йин МЧС-дин вакилари дезинфекция гъапIну.