Сабпи сентябрилан башламиш дапIну, Урусатдин вузар аьдати къайдайиинди, очно жюрейиинди лихуз хъюгъди. Дидин гьякьнаан августдин 11-пи йигъан Урусатдин Президент Владимир Путинди РФ-дин Правительствойин членарихъди гъубху совещаниейиъ образованиейин министр Валерий Фальковди мялумат тувну.

 

Дугъан гафариинди, вари урхбан идарйириъ гьар йигъан студентарин ва мялимарин бедендин температура ебциди, дарсар кивру кабинетариъ гьавайин дезинфекция апIиди. Урхбан идарайиъ айидари маскйир алахьувал чарасуз къайда ву. Хусуси сагъламвал уьбхру алатар ишлетмиш дарапIуз яратмиш апIбахъди аьлакьалу вуйи дарсариъ студентаризтIан ва лекцйир урхруган мялимаризтIан ихтияр адар. Министри къайд гъапIганси, физкультурайин дарсар марцци ачухъ гьава-йихь гъахуз хъюгъди.

«Бедендин сагъ апIуз даршлу уьзрар кайи студентарихьан урхбан хусуси планариз асас вуди ляхин апIуз шулу. Коронавирусди хатIалу тясир апIуз мумкин вуйи вуздин гъуллугъчйириз манзилнаъди ляхин апIуз мумкинвал тувди», – гъапну Валерий Фальковди. Дидланра савайи, министри мялум гъапIганси, харижи уьлкйириан вуйи студентар, Урусатдиз дуфну карантиндиъ кьюб гьяфта адапIбан кьяляхътIан, дарсарихьна деетидар.

РФ-дин образование-йинна илимдин Министерст-войин кIулиъ айирин гафариинди, жигьиларин арайиъ «марццишнан цIийи культура» тербияламиш апIувал вузарин – асас буржарикан саб хьибди.

Гьадму совещаниейиъ мярифатнан министр Сергей Кравцовди туву мялуматариинди, марццишнан хатIасузвалин тIалабар тамам апIуруш, 1-пи сентябрилан тина мектебариъра ахтармиш апIуз хъюгъди.

Июлин аьхириъ Рос-потребнадзори коронавирус тарабгъру шартIариъ вузари ляхин апIбан тIалабар чап гъапIнийи. Думу документдиъ дупнайиганси, мялимарин ва студентарин бедендин температура йигъан кьюб ражари ахтармиш дапIну ккунду. Дурари гьацира маск-йир алахьувал чарасуз лазим ву. Минобрнаукайи июндин вазлиъ туву мялуматариинди, Урусатдин вузари абитуриентарин документар хусуси метлеб айи сервисдин кюмекниинди электрондин къайдайиинди кьабул апIуру.