Гъябгъюрайи йисан эвелиан мина Дагъустандин рякъяриъ машинарин аварйир хьпан хатIалу дюшюшариъ 162 кас гъийихну кIури, улихьна йигъари республикайин Глава Владимир Васильевди тешкил гъапIу заседаниейиъ вахтназ вуди РД-йин айтIан ляхнариз лигру министрин вазифйир тамам апIурайи Дмитрий Гутыряйи мялум гъапIну.
Заседаниейиъ Дмитрий Гутыряйи къайд гъапIганси, ццийин йисандин эвелиан мина августдин вазлизкьан региондин рякъяриъ 763 аварйир гъахьну. Натижайиъ 162 кас гъийихну ва 1024 касдиз жюрбежюр гъагъишнан зийнар гъапIну.
Дугъан гафариинди, му улупбар 2012-пи йисандин улупбарихъди тевиш, думугантIан цIибди ву.
Министрин вазифйир кIулиз адагъурайири, чан улхуб давам апIури, къайд гъапIганси, Урусатдин Федерацияйин Президент Владимир Путиндин «Майин Указариъ» улупнайиганси, Дагъустандиъ 100 агъзур агьалйириина рякъярин жюрбежюр аварйириъ гъийихдарин кьадар 360 кастIар артухъ духьну ккундар. Гьаддиз гъи, региондиъ айи аьгьвалат дигиш апIбан бадали, янаки рякъяриъ арайиз гъюрайи хатIалу дюшюшарин кьадар кам хьуз гъитбан бадали, рягъярихъди душваъ шулайи къанунсуз гьяракатар видеойиз адагъру видеофиксаторар керхра.
ХатIасузвалин дюшюшар арайиз дяргъбан бадали, РД-йин МВД-йин УГИБДД-йин гъуллугъчйирира профилактикайин, яна машинарихъ хъайидар гъаврикк ккаъбан серенжемар кми-кмиди гъахура.
Му жюрейин серенжемар гъахбан натижайиъ асас вуди ашкар шулайи хатIалу дюшюшар гьамцдар ву: светофорин кабхьнайи уьру аквназ дилигди, машин хъапIувал, арччул гъвалхъанди улихь хьайи машин хътипувал, машинарин шюшйир кIару апIувал, хатIасузвалин чIулар ишлетмиш дарапIувал ва бицIидар гъахбан къайда дюрюбхрайивал. Натижайиъ тахсиркрариина 1300 административ протоколар гъидикIну.
Гьамциб ляхин гъабхували рякъяриъ шулайи аварйирин ва хатIалу дюшюшарин кьадар кам хьуз гъитур кIури, умуд кивдихьа.
