Ватандин Аьхю дявдиъ чпик кайи гьунарар улупу, гъаних душмнихъди вуйи женгариз кьадар адрубкьан зурба кьувват сарф дапIну, ухьуз азадвал багъиш гъапIу, ухьу чпиинди дамагъ апIурайи аьхю наслин вакилар йигълан-йигъаз кам шула.
Улихьна йигъари дявдин сарсан ветеран, Дагъустандин Огни шагьриъ яшамиш шули гъахьи, 1923-пи йисан Табасаран райондин Гъуярик гъулаъ бабакан гъахьи Рамазан Къурбанов, 97 йисан яшнаъ ади кечмиш гъахьну. Думу касдикан учу «Табасарандин нурар» газатдиъ швнуб-сабан гъибикIнийча, хъа гъира дибрикIди гъибтуз шуладар.
Къайд апIуз ккундузузки, 1943-пи йисан жвуван хизан ккебгъбалан кьяляхъ, чан уьмрин юлдаш Герек дадайихъди хулаъ гъитну, Рамазан Къурбанов дявдиз гъушнийи ва Смоленск шагьриъ гъати женгариъ иштирак гъахьнийи. Гьадушваъ дугъак сабпи гюллера кубкIну. Дидиз улихьна йисари думу, хулаъ адаш адрувализ лигну, хъа дадайихъди 3 бицIи чйир гъузрайивал себеб вуди армияйиз гъухундайи.
Шубуб вазлин арайиъ зиян сагъ гъабхьибси, Украинайин фронтдин дахилнаъди фашистарихъди женгариъ иштирак шулайи дугъан хилиз хъанара зиян апIуру. Му ражари гъабхьи зиян думукьан аьхюб дайи, ва хил сагъ гъабхьибси, думу дишлади Белоруссияйин фронтдин 3-пи дивизияйиз гьаъру ва гьадму фронтдин дахилнаъди Брянскдиъ гъубшу гъати женгнаъ иштирак шулу. Мушваъ гъуху женгариъра Рамазан Къурбановдиз бицIи зиян шулу.
Ватандин Аьхю дявдиъ жавабдарвал ва жюрэтлувал улупбаз лигну, Рамазан Къурбанов 24 орденариинди ва медалариинди лишанлу дапIна. Дурарин арайиъ «Уьру Хяд», Жуковдин ччвурнахъ хъайи, «1941-1944-пи йисари Ватандин Аьхю дявдиъ Германияйиин гъалиб хьпаз лигну» ва Машгьурвалин орденарра а.
15-пи августдиъ сарсана Ватандин Аьхю дявдин ветеран, Табасаран райондин Дарвагъ гъул’ан вуйи, 98 йисан яшариъ айи Аьли Аьлиевра кечмиш гъахьну.
Аьли Баладжаевич 1942-пи йисан июндин вазлиъ дявдиз гъушну. Дугъу 509-пи стрелковый полкнан 236-пи стрелковый дивизияйиъ гъуллугъ апIури гъахьну. Туапсе шагьрин гъирагъдихъ гъуху женгариъ гюлле кубкIну, дугъаз гъагъи зиян гъабхьнийи.
Ватандин Аьхю дявдин женгариъ дирбаш’валиинди иштирак хьпаз лигну, Аьли Аьлиев швнуб-саб медалариинди ва Ватандин Аьхю дявдин 1-пи дережайин ордендиинди лишанлу дапIна.
Ихь игитар, дявдин ветеранар Рамазан Къурбанов ва Аьли Аьлиев кечмиш хьувалихъан дерин пашманвал зигури, «Табасарандин нурар» газатдин колективди дурарин хизанариз, багахьлуйириз башсагълугъвал ккун апIура.
