Шаду инсандин уьмур ярхиб шулу, кIури шулу. Гъи узу чакан макьала бикIурайи, Дагъустандин Огни шагьриан вуйи ихь ватанагьли Марат Султановра гьадму жюрейин шаду касарикан ву. Учв Марат студентарикан ибарат вуйи КВН-дин «Все сразу» дестейин капитан ву.
Улихьна йигъари Марат Султанов «Табасарандин нурар» газатдин редакцияйиз хялижв гъахьну. Сюгьбат ккебгъри, дугъу учв фици КВН-диин машгъул гъахьнуш ктибтнийи.
Дугъан гафариинди, думу Дагъустандин Огнийиъ мектеб ккудубкIбалан кяляхъ, Дагъустандин гьюкуматдин халкьдин мяишатдин университетдин (ДГУНХ) налоговый факультетдик урхуз кучIвну. Ужудар аьгъювалариинди университет ккудубкIну, думу гьадму университетдиъ ва Дагъустандин гьюкуматдин гъулан мяишатдин университетдиъ (ДагГАУ) жигьиларин ляхнариз лигру комитетдин гъуллугъчиди лихури гъузну.
«Узу университетдик кучIвруган, димигандиз ду-шваъ урхурайи йиз аьхюну гъардаш Максим Султановди, учв капитан вуди, университетдин студентарикан ибарат вуйи КВН-дин десте тешкил дапIнайи. ЦIиб вахтналан университет ккудубкIбалан кьяляхъ, дугъу му ляхин узухьна тувнийи. Гьаци узу КВН-дин командайин капитан гъахьунза. Дагъустандин университетарин КВН-дин командйирин арайиъ кIули гъахури гъахьи талитариъ учу хъади-хъади 4 йисан гъалиб шули гъахьунча. Мушваъ гъалиб хьпан кьяляхъ, 2015-пи йисан КВН-диан Ставрополь шагьриъ кIули гъубшу Кафари Кавказдин лигайиъра иштирак’вал дапIну, душваъра гъалибвал гъадабгъган, учуз Ямало-Ненецкий Автономный округдин Салехард шагьриъ КВН-диъ иштирак хьуз теклиф гъапIнийи. ИкибаштIан, учу рази гъахьунча, ва иштирак духьну, душваъра гъалиб гъахьидариз Калиниградский областдин губернаторин кубокдиз вуйи КВН-дин лигайиз дих гъапIунчуз. Душваъра учу улупу нумра варидариз кьабул гъабхьнийи ва жюрийи ич «Все сразу» команда гъалибчиди гъядябгънийи. ЦIиб вахт гъябгъбалан кьяляхъ, гьадму йисан, КВН-дин заан лигайиъ иштирак шулайи, Дагъустандиан уч дапIнайи командайин дахилнаъди Москва шагьрин мэрин кубокдиз вуйи лигайиъ иштирак хьуз узузра дих гъапIнийи. Гьелбетки, узу рази гъахьнийза. Думуган Федералин 1-пи каналиан вари Урусатдиз улупу КВН-дин талитариъ учу гъалибвал гъадабгънийча, ва думу кубокдин сагьибар духьну, Дагъустандиз гъафунча.
Гьаммишан гъалиб шули а кIури, хиял мапIанай. Гъалиб дархьиди гъузу вахтарра гъахьнийич. Хъа дици ву кIури, хъюгънайи ляхин дипуз шулдар»,
– кIура Маратди.
Ич арайиъ кIули гъубшу сюгьбатнаъ дуфнайи хялижвди КВН-дин зарафатар фици арайиз гъюраш, кадагънайи зарафат дурари сягьнайиин фици улупураш ва жара йи-швариъ Дагъустандин командайихьна вуйи янашмиш’вал фициб вуш, ктибтнийи.
Дугъан гафариинди, фуну региондиз гъушишра, ихь командайихьна лап гьюрмат ади янашмиш шула ва зарафатарра заан аьшкьниинди кьабул апIура.
«Мина-тина командировкйириз гъягъруган, дих дапIнайи йишваъ, учухьна чпин гьюрмат улупури, вахт ккимидин зенгар апIури, кюмек лазим вуш, гьязур вуча, кIуру касарра хайлиндар шулу. Хъа ич командайиз варитIан гизаф кюмек гъапIур ДГУНХ-дин ректор Ягь’я Бучаев ву. Думу касдиз аьхю чухсагъул мялум апIураза.
Хъа КВН-дин командайин иштиракчйирикан улхуруш, ич командайиъ асас вуди айидар вари баяр вуйич. Гьадрарикан шубур кас табасаранар ву. Гьар ражари КВН-дин серенжемдиз гьязур шлиган, учуз асас вуди зарафатар гьязур апIрур командайин улихьди гъягъюрайи Назир Уьмаров вуйи. Думу ич университетдиан дайи. Дагъустандин гьюкуматдин медицинайин университетдин командайигъди КВН-диъ иштирак шули гъахьи Назириз, чпин команда гъарабгъиган, учухьна дих гъапIнийча. Варидариз думу табасаран бай вуйиб аьгъяйи, фицики дугъу наан ашра сягьнайиина удучIвиган, сабпи гафар чан адашдихьна илтIикIну кIурайи жюрейиинди табасаран чIалниинди кIури шуйи. Саб ражари думу сягьнайиина табасаран халачийигъян гъидижну удучIвну. «Жвуван хулаъ айиганси азуз» зарафат варидариз лап кьабул гъабхьнийи. Учу гьамциб жюрейиинди сягьнайиина удучIвури шуйча. Хъа гьамусяаьт коронавирусдихъди вуйи аьгьвалат кьяляхъ дубшну адрувализ лигну, учхьан гьелелиг хъюгънайи ляхин давам апIуз шуладарчухьан. Гьаддиз вахтназ вуди узу сумчрар гъахбан ляхниин машгъул духьназа. Фицики, гъийин девриъ ляхин адарди яшамиш хьуз лап гъагъиди ву», – аьлава гъапIнийи Марат Султановди.
Марат, увуз учухьна редакцияйиз гъюбаз чухсагъул кIурача ва уву гьаммишан гьамцир зарафатчиди гъузбак умуд киврача.
P.S. Газат чапдиан удубчIвайиз сад йигъ ккимиди учуз мялум гъабхьиганси, РД-йин жигьиларин ляхнариз лигру Министерствойин ватанпервервалин тербия тувбахъди аьлакьалу «РД-йиъ жигьиларин политика уьмриз кечирмиш апIбан» программайин дахилнаъди кIули гъубху проектарин грантдиз вуйи конкурсдиъ гъалиб гъахьи 5 касдин проектарикан саб Марат Султановдин «Ватанпересвалин театр» кIуру проект ву. Думу проект уьмриз кечирмиш апIбан бадали, министерствойиан Маратдиз 100 агъзур манатдин грант тувну.
