Шаксуз, пишекар инсанарин цIийи насил тешкил ва тербияламиш апIбаъ образованиейин циркли асас йишв бисура. Живанариз илим тувбан месэлйирин важиблуваликан Урусатдин гьюкмин кIулиъ айидарира кьатI’иди дупна. Ав, мектебди ухьу гележегдин яркьу уьмрихьна гьязур апIура. Фицики уьмриъ заан пIипIариз удучIву гьарсар инсандин хъуркьуваларин эвеларра мектебдиан ккергъра.
Образованиейин гъурулуш артмиш апIури, аьхиримжи йицIуд йисандин муддатнаъ Хив райондиъра натижалу серенжемар кьабул дапIна. Гьадму гьисабнаан хайлин гъулариъ цIийи мектебар ишлетмиш’вализ тувна, бязи мектебариъ расвалин ляхнар духна, мектебар лазим вуйи материалинна техникайин тадарукарихъди тямин апIбаз дикъатлу фикир тувра.
2020-2021-пи урхбан йисахьна гьязур шули, йишвариин вахтназ улихьна лазим вуйи серенжемар гъурхну. Хив райондин саки вари мектебариъра урхурайидар аьгъюваларин Йигъан кьабул гъапIну. Гьяйифки, вари уьлкейин гьякьикьат гъизгъин гъапIу коронавирус уьзрихъди аьлакьалуди аьгьвалат пучIу дубхьну адрувалиан улихьна йисари аьдат духьнайи шадлугънан мяракйир гъахувал цци жавабдар гъуллугъари къадагъа гъапIнийи. Гьаддиз урхбан цIийи йис баяр-шубариз дуствалин ва сагъламвал уьбхбан дарс кивбалан ккебгъну.
Баяр-шубарин ва мялимарин сагъламвалин хатIасузвал тямин апIувал метлеб вуди, мектебариъ учIвруган, Роспотребнадзорин тIалабар тамам апIури, гьарсарин бедендин температура ебцувал, вари классар медицинайин бегьлийирихъди ва маскйирихъди, хилар марцц апIбан бадали, тялукь антисептикарихъди тямин апIбан серенжемар кIули гъахура.
Хив РОО-йин кIулиъ айи Назаряли Тарлановди субут гъапIганси, улубкьнайи урхбан йисан райондин мектебариъ сабпи классариз 237 кас кьабул дапIна. Уьмуми гьисабариинди му йисан райондиъ 2444 балина шуру аьгъювалар гъадагъиди. Мялимарин тяминваликан гъулхиш, гьяйифки, хайлин пишекрарин гьякьнаан му месэла ачухъди гъубзра. Улупнайи вахтназ Хив райондиъ физика, математика, химия, харижи ва урус чIаларин мялимариз игьтияж а.
Райондин глава Ярмет Ярметов, улубкьурайи урхбан йисахъди урхурайидар ва мялимар тебрик апIбан бадали, му йигъан Хиварин мектебдиз хялижв гъахьну. Чан улхбаъ дугъу образованиейин гъурулуш артмиш апIбан жигьатнаан республикайиъ, гьадму гьисабнаан Хив райондиъра, гъахурайи серенжемарикан яркьуди гъапну. Дидланра савайи, главайи илимдин цирклиъ зегьмет зигурайи вари иштиракчйириз му баркаллу рякъюъ гъийин читин вахтна мюгькам сагълам’вал ва заан хъуркьувалар ккун гъапIну.
КIваина хурза: COVID-19 уьзур тарабгъувал дебккбан метлебниинди уьлкейиъ мялум гъапIу карантиндин натижайиъ цци баяр-шубарин тятIилар лап ярхидар гъахьну. Чарасузвалиан мялум гъапIу манзилнаъди аьгъювалар тувбан къайда гъуларин шартIариъ гьичра сабдизра даруб гъабхьну. Тялукь аьгьвалатнаъ баяр-шубар анжагъ кьяляхътIан гъивундар.
Гъит баяр-шубариз му урхбан йис, алахьу камивалар тарихдиъ гъузну, сагъламвалин рякъ’ан хатIасузуб, хъуркьувалар айиб ва ислягьуб ибшри!
