2020-пи йисан 13-пи сентябриъ Дагъустан Республикайин «Табасаран район» МР-ин ругариин муниципалин сечкйирин сесер тувбан саб вуйи йигъ кIули гъубшну. Мялум вуйиси, Урусатдин Федерацияйин ЦИК-ди 2020-пи йисан 24-пи июлиъ адабгъу къарариз асас вуди, агьалйирин сагъ’вал уьбхбан бадали, сесер тувбан саб вуйи йигъ улубкьайиз улихьна йигъарира сесер тувбан ихтияр айивалин къайда тартиб гъапIнийи. Гьаци, сечкйир шубуд йигъандин арайиъ давам гъахьну – 11-13-пи сентябриъ.
Табасаран райондин ТИК-диан тувнайи мялуматариз асас вуди, райондиъ гъуларин поселенйирин депутатарин cобранйириз депутатар ктагъбан 21 сечкийин кампания кIули гъушну. Сечкйириъ жанлу иштирак’вал улупу гъуларин поселенйир гьамцдар ву: Сиртич гъулаъ яшамиш шулайи вари 2487 сечкичйирикан сечкйириъ 2163 кас иштирак гъахьну. Миди сечкйириъ 86,97% инсанар иштирак гъахьивал улупура; ГьепIларин советдиъ сесер тувуз ихтияр айи 1623 касдикан 1411 кас сечкйириъ иштирак гъахьну (86,94%); Бургьанкент советдиъ 610 касдикан 504 касди сечкйириъ иштирак’вал гъапIну (82,62%); Хили-Пенжигьарин советдиъ 866 сечкичийикан 705 касди сечкйири иштирак’вал гъапIну (81,41%); Хючнаарин советдиъ сесер тувуз ихтияр айи 4388 касдикан 3523 кас сечкйириъ иштирак гъахьну (80,29%).
Хъа сечкйириъ варитIан зяифди иштирак’вал гъапIу гъулан поселенйир исихъ кудухнайидар ву:
ТинтIарин советдиъ яшамиш шулайи 1681 сечкийирикан сечкйириъ 785 касди иштирак’вал гъапIну. Миди сечкйириъ 46,70% инсанар иштирак гъахьивал улупура; Гурхъарин советдиъ яшамиш шулайи 1473 сечкичийикан 692 касди сечкйириъ иштирак’вал гъапIну (46,98%); ЧвулатI гъулаъ яшамиш шулайи 795 сечкичийикан 407 кас сечкйириъ иштирак гъахьну (51,19%); Къужникарин советдиъ яшамиш шулайи 1943 сечкичийикан сечкйириъ 1097 кас иштирак гъахьну (56,46%); Жулжгъарин советдиъ яшамиш шулайи 1402 сечкичийикан сечкйириъ 808 кас иштирак гъахьну (57,63%).
Вари Табасаран райондиъ яшамиш шулайи 34598 сечкичйирикан сечкйириъ 23722 касди иштирак’вал гъапIну, миди сечкйириъ 68,56% сечкичйир иштирак гъахьивал улупура. Сечкичйири варитIан гизаф сесер «Саб вуйи Урусат» ВПП-йин кандидатарихъан тувну. Сечкйириъ думу партияйин терефнаан вуйи 152 кандидат гъалиб гъахьну. КIули’инди вуйи кандидатарикан 70 касди гъалибвал гъадабгъну. Хъа «Гьякьлу Урусат» ПП-йин – 9 кандидат гъалиб гъахьну.
Райондиъ саб вуйи сечкйирин йигъ тешкиллувалиинди кIули гъубшну.
