Мялум вуйиганси, 11-13-пи сентябриъ Урусатдиъ ерли поселенйирин собранйириз депутатар ктагъбан сечкйир кIули гъушну.

 

Хив райондин ТИК-дин председатель Исрафил Сялигьовди къайд гъапI-ганси, райондиъ сечкйир ужуб иштирак’валиинди, ачухъ’-валиинди кIули гъушну.

– Ерли поселенйирин собранйириз депутатар ктагъбан сечкйирихьна вари вахтари райондин агьалйири маракьлувал улупури гъахьну. Му ражарира Хив райондин гъулариъ 63,1% сечкичйири сесер тувну.

Улихьмиди лазим вуйи гьязурлугар гъахбан натижайиъ сечкйириз гьязур гъапIу вари 35 УИК-диъ ляхин саб жюрейинра камивалар адарди гъабхуз мумкинвал гъабхьну.

Улупнайи вари УИК-ар материалинна техникайин лазим вуйи вари алатарихъди тямин вуйи. Сечкичйирин хатIасузвал уьбхбан бадали, му ужагъар термометрарихъди, маскйирихъди, бегьлийирихъди, антисептикарихъди тямин гъапIну. Сечкйириъ иштирак гъахьи 219 кандидатдин арайиан сечкичйири 158 касдин тереф гъюбхну. Дурарин арайиан 117 депутат «Саб вуйи Урусат», 4 – «Гьякьлу Урусат» партияйин вакилар, хъа 37 кас чпин хушниинди гьюкмиъ иштирак хьуз маракьлувал улупдар ву.

ХатIасузвал уьбхбан месэла лазим дережайиъ дебкк-бан натижайиъ улупнайи серенжемар райондиъ мясляаьтниинди гъахуз мумкинвал гъабхьну. Аьлава апIурза: йишвариин гьюкум тешкил ва идара апIбаз главйириз къанундиинди улупнайи вахт ккудубкIурайи ерли поселенйириъ йисан аьхирариз депутатари цIийи главйирра ктагъиди, – гъапну дугъу.