Республикайин МВД-йин Госавтоинспекцияйин мялуматарин гъуллугънаан учуз туву мялуматариинди, сентябрин 27-30-пи йигъари Дагъустандин аьтрафариин профилактика гъабхбан метлеб ади «Къайда чIур мапIан – рякъ тув» серенжемар кIули гъушну.

 

Госавтоинспекцияйин мялуматарин гъуллугънаан къайд гъапIганси, Дагъустандин аьтрафариин ерлешмиш духьнайи машинар хъаъру рякъяриъ аварйир хьпахъди аьлакьалу аьгьвалат гьелелиг гъагъиди гъубзра. 2020-пи йисан 8 вазлин арайиъ гъубху анализди улупурайиганси, республикайин рякъяриъ кючйири чиб-чпихъди кьатI апIурайи йишвариъ машинар хъаърудари нубат дюрюбхювалин ва рякъюн къайда чIур апIувалин натижайиъ рякъюнна транспортдин 151 бедбахтвалин дюшюшар гъахьну. Думу дюшюшариъ 15 кас гъийихну, хъа 235 касдиз жюрбежюр гъагъишнан зийнар гъахьну.