Табасаран райондин жигьиларин центрин директор Рамис Рамазанов, В.В.Путинди медалихъди лишанлу гъапIну. Му медаль дугъаз Табасаран райондиъ вари Урусатдин «Ухьу сатIиди вухьа» кIуру сар-сариз кюмек апIбан акция лап кIваантIан дикъатлуди албагбаз тувуб ву. Москвайиан Дагъустан Республикайиз хьади дуфну, му пешкеш Рамис Рамазановдин хилиз Урусатдин «Волонтёрар медикар» кIуру халкьдин гьяракатнан директор Павел Савчукди гъурубкьну.

 

Дюн’яйиъ лап чIуру «Covid-19» кIуру уьзур абхъхъан тина 2020-пи йисан майин вазлихъан июлин вазлизкьан Табасаран райондин жигьиларин центри 1500 хизандиз кюмек гъапIну. Уьзур ктрубчIвуз лазим вуйи хилар жикIру шей’ар ва маскйир пай гъапIну. Кьабидариз ва лап читин гьялнаъ айи хизанарин хулариз дармнар, гьацира ипIру-убхъру шей’ар хьади гъушну.

Му ляхин лап ужуди албагбан бадали, Табасаран райондиъ Рамис Рамазановдин регьберваликкди «Ухьу сатIиди вухьа» кIуру акцияйиинди саб-швнуб бригада тешкил дапIна: «Табасарандин жигьиларин центр», «Табасарандин жигьиларин армия», «Табасарандин гъалибвалин волонтёрар», «Табасарандин жигьилар», «Табасарандин волонтёрар» кIурудар. Рамис Рамазанов гьацира «Умуд» кIуру фонднан аьхюрра ву. Думу фонднура лап читин гьялнаъ айи, гизаф бицIидар хъайи хизанариз жюрбежюр кюмекар апIура.
Гъит ихь халкьдин арайиъ гьамцдар жигьилар артухъ ишри.