Гьар йисан, гъизилин чвлин лишнарихъди сабси, ихь уьмриз, натижайиъ ужудар марцци ва аку гьиссарин ирс гъибтри, саб хайлин машкврарин десте гъюра. Мисалназ, гъадагъиш: «Дагъустандиъ яшамиш шулайи халкьарин сабвалин Йигъ», «Мялимарин Йигъ», «Духтрарин Йигъ», «Дадайин Йигъ» ва жара аку машкврар. Гьаму мяракйирин ва серенжемарин арайиъ «Яшлуйирин Йигъ» машкврира зурба йишв бисура.
Октябрин 1-пи йигъ ихь уьлкейиъ 1992-пи йисхъан мина яшлуйирин Йигъси къайд апIура. Вари ккудушу йисари, му Йигъ тебрик ва къаршуламиш апIури, Хив райондиъ, райондин мектебариъ, бицIидарин багъариъ, гъулариъ ва культурайин хулариъ саб жерге серенжемар кIули гъягъюри шулу. Ццира му Йигъаз тялукь вуди культурайин хулариъ ва мектебариъ, гьам яшлуйиризра теклиф дапIну, цалин газатар гьязур апIури, фольклорианна тарихнаан классдин гъирагъдихь вуйи ачухъ дарсар кIули гъахура.
Урхурайидари абйир-бабариз бахш вуди чпи дюзмиш дапIнайи сочиненийир, кадагънайи шиърар кIваъланди урхруган ва фольклориан дивнайи сягьнйир улупруган, янаки, саб гафниинди, гьамусдин насларин терефнаан яшлуйирихьна вуйи кьимат ва хатур-гьюрмат гъябкъиган, хъугъай, гьюрматлу ватанагьлийир, шадвалиан уларилан нивгъ гъубшнийиз. Фицики, гъийин насларин терефнаан гьелелиг яшлуйирихьна вуйи янашмиш’вал ухьу фу кIурушра, заан дережайиъ ими.
Хив райондиъ урхурайидарин, волонтёрарин ва жигьиларин ляхнариз гъилигиган, думу гьаци вуйибдиин узу инанмиш гъахьунза. Неинки гьам рякъ-хулиъ алахъу-гьахъу яшлуйирихь хьайи гъагъариз кюмек апIурайивализси, хулариз гъягъюри, шид хуз, марццишин апIуз, яшлуйирихъди багълар-бистнариз гъягъюри, яр-йимиш уч апIуз кюмек тувбан ляхнар-карар гъяркъиганра.
Жигьил наслариз ва ктучIвурайи набалугъариз мициб тербия туврайи ва инсанвалин дарс улупурайи райондин вари агьалйириз марцци кIваан чухсагъул мялум апIураза.
Мидланра савайи, райондин ЦСОН-дин директор Надир Уьмаров кIулиъ ади, му идарайин вари коллективдиз ихь халкьдин, газатдин ва газат урхру вакиларин терефнаан чухсагъул мялум апIуз ккундузуз. Фицики му тешкилатдин гъуллугъчйири гьарсаб гъулаъ ляхин гъабхури, хулаъ ялгъуз яшлу гъарина гъужа айи хизанариз кюмекар туври, саб хайлин жафа зигура. Дурарин зегьметнакан, агьли касарин гъайгъушнаъ айиваликан яшлу касарин чпин ктибтбариан ебхьуз, тамаши апIуз, кьимат дивуз ккунди аш, Инстаграмдиъ машра а – (cson_hiv).
