22-пи сентябриъ Дагъустандиъ Шамхал поселокдиъ айи ижми къайдайин дустагъдиан гьергу 6 тахсиркар 30-пи сентябриъ Калмыкияйин аьтрафариин гъидисну. Дидин гьякьнаан Республикайин МВД-йин Управлениейин мялуматарин гъуллугънаан хабар тувну.
Мидланра савайи, Силисчивалин комитетдин Дагъустандиъ айи Управлениейиан туврайи мялуматариинди, сад йигъ улихьна дустагъдиъ айидариз гьергуз кюмек гъапIу кас дисуваликанра мялумат тувнийи. Думу кас сар тахсиркрин багахьлу вуди гъахьну. Тахсиркрариз кюмек туву касдиина РФ-дин УК-йин 5-пи пайнан 33-пи маддайиз ва 2-пи пайнан 313-пи маддайиз асас вуди (дустагъдиъ айидариз гьергуз кюмек апIбаз лигну), дело гъитIибккна.
Тахсиркарвал гъапIу касдиз жаза чарасуз лазим ву. Белки, гьадму дустагъдиъ дуснайи вахтна дугъу чав гъапIу тахсиркарвалин швумалвал зигур, белки думу, чан хасият дигиш дапIну, дустагъдиан удучIвур. Хъа эгер тахсиркар чан хасият ва гъиллигъар дигиш апIбанди дарш, дицир кас чан дустагъдиъ ади ужу ву. Думу аьдати инсанарихъди яшамиш хьуваликан хатIа хьуз мумкин ву.
Тахсиркрар дустагъдиан гьергиган, социалин сетариъ «маншаллагь баяриз», «душваъ тахсир ктарди дуснайидар гизаф а», «гьергнуш, лап ужуб гъапIну» кIуру гафар гизафдариз гъяркъну. Гьаци кIури айидари, кьабул дапIну, гьаз дурар ичв хулаъ гъюрхюндарчва? Фу-вушра бикIуз ухьу дирбашдар вухьа, хъа йишв’ин алабхъиган, кIул гъюнаригъна зигурхьа. Гьацдар гафар дикIурайидариз кIураза, тахсиркрари йивну гъакIи инсандинра гьаму уьмрихъ улар хъмийи, дугъазра чан хизандихъди яшамиш хьуз ккундийи. Дустагъдиъ айир, жаза дизигну, йисарилан вушра удучIвиди, хъа гъакIи кас тму дюн’яйиан гьич сабанра кьяляхъ гъафундар. Наркотикар тарагъувалра гизаф чиркин ляхин ву. Ухьуз варидариз ккуни веледар ахьуз. Дурар закурин йигъан ужудар инсанар хьпан бадали, гьарсар абайина бабу жафа зигура. Хъа сад йигъан гьаму наркотикар масу тувру, ляхин дарапIди девлетлу хьуз ккуни гьярамзада алахъиган, жигьил, набалугъ касдин уьмур кур апIуру. Сар дугъан уьмур кур шулдар, думу аьхю гъапIу абайинна бабан, хизандин гизаф йисари гъизигу жафа барбатI шулу.
Социалин сетариъ, аьхюдарси бицIидарра дусна. Гьадрари ухьу гъибикIубдиз фикир тувра. Эгер учвуз ужуб бикIуз ккундарш, харжибра мибикIанай. Ичв кIул’ина дуфну даккниб жара касдизра ккун мапIанай. Ихь веледари тербия ухьхъан гъадабгъура.
