Хьадукран сабпи вазлин гьацIкьялариан хъюгъну, мартдин 21-пи йигъазкьан ихь респуб-ликайиъ азербайжан халкьди «Навруз-байрам», лезги халкьди «Яран Сувар», табасаран халкьди «Эбелцан» кIуру машкврар къайд гъапIну. Кьибла Дагъустандиъ му машкврарихъди аьлакьалу мяракйир жюрбежюр тешкилатариъ кIули гъушну ва ихь халкьарин кюгьне аьдатар кIваин гъапIну.

 

Мартдин 18-пи йигъан Дербент шагьриъ айи Пётр Сарпирин хулаъра, му йигъарихъди аьлакьалу мярака кIули гъабхбан бадали, Дербент шагьриъ айи вари театрарин, музеярин пишек-рар, шагьрин музыкайин училищейин ва халкьарин сяняаьткарвалин колледждин коллективар, шагьрин агьалйир уч гъахьну.

Серенжем ачмиш апIури, Дербентдин тарихдин, архитектурайин ва художествойин музей-заповедникдин директор Аьли Ибрагьимовди уч духьнайидар му машкврихъди тебрик гъапIну.

«Ихь абйирилан гъузнайи аьдатар, культура уьрхюз чалишмиш шули, ихь наслари дурар кIваълан гьадрархбан бадали, ухьу му мяракйир тешкил апIурахьа. Гьацира ухьу сабхилди мицдар мярак-йириъ иштирак шулайивали ихь дуствал мюгькам апIура»,

– гъапну дугъу.

Му йигъан мярака кIули гъабхурайи Эльчин Къулиевди ва Ульвия Бабаевайи хьадукран машкврин тарихдикан ктибт- ну. Азербайжан театрин лайикьлу актёрар вуйи Мягьярам Уьмаровди, Севда Бейболаевайи ва гьацира жара артистари му машкврин тарихдиз бахш вуди «Кечал ва Кёса» кIуру спектаклин кьатI улупну. Серенжемдиъ «Каспий» ялхъвнарин ансамблин иштиракчйирира чпин устадвал улупнийи.

Гьацира лезги театрин артистари, музыкайин училищейин студентари лезги чIалниинди мяълийир гъапIну. Ихь халкьдин вакиларикан, табасаран театрин терефнаан мяълийирин устад Фаина Аьбдуллаевара иштирак гъахьну. Мидланра гъайри, аьхиримжи вахтна шагьриъ гъягъру серенжемариъ иштирак шулайи музыкайин училищейин студент, ихь ватанагьли Альфред Гюлечевдира «Табасаран» кIуру мяъли гъапIну.

Серенжемдин аьхириъ уч духьнайидари му йигъаз гьязур дапIнайи лизи луфар, чпин метлебарра кIваин апIури, завуз деетну. Йиз гъвалахъ хъайи швнур-сар касди, луфар деетури, «вари дюн`яйиъ ислягьвал гъубзри, Жилиин гьич саб йишваъра гъалмагълар даришри, халкьар албагну гъузри», – гъапнийи.

Халкьарин сабвалиинди гужли вуйи ихь Дагъустандин жилиинра гьаммишан мясляаьт ва сабвал гъубзри! Ухьу гьар вахтна халкьарин арайиъ айи дуствалин къанунар уьрхюз, артмиш шулайи баяр-шубариз дуствалин кьимат, ужубна харжиб жара апIуз улупуз буржлу вухьа.