Йиз ляхниъ узуз гизафна-гизафси ихь халкьдин дирбаш баярикан, жумарт юкIв айи, зигьимлу инсанарикан макьалйир дикIуз ккуниб вузуз. Дицисдар инсанарихъди сюгьбат гъабхруган, жуван юкIвра саламатнан гьиссари абцIру. Гьацдар инсанарикан сар Иваново шагьриъ яшамиш шулайи ихь ватанагьли Исахан Сафарчиев ву.
Иваново шагьриъ чан хал-хизандихъди яшамиш шули, дугъан саки 20 йис ву. Ватандихьан ярхла яшамиш шулашра, думу чан рягьимлу ляхнариинди, ихь республикайинси, Урусатдин шагьрариъ яшамиш шулайи табасаранарин арайиъра ужур инсанси машгьур духьна. Гъи Иваново шагьриъ дугъан саб ччвур пуб чIяаьн ву. Хъа вари хизандилан ккебгъра, албагу хизандилан. Дагъустандиъ, аьдат вуйиганси, гьациб хизандин эдеблувалин бинайиъ дагълу халкьдин фагьумлувал, дирбаш’вал, гъиллигъ, аьдатар уьрхюру. Сафарчиеварин кюгьне тухмарин баркаллу ччиварин тарихдикан улхуруш, дурар фагьумлу, чпин ата-бабйирин аьдатариз гьюрмат апIури гъахьи халис дагълуйир Къеримхан халу ва Севдет хала (Исахандин адашна дада) ву. Дурари, гьадму саб вахтна дагълу гъулариъ варидариси, чпин багъри Заан Яракк гъулаъ жил тартиб апIури, убзури, ккадабцIури, чпин веледариз тербия туври, шаду, берекетлу уьмур хъапIуз, ватандиз вафалу инсанар хьуз рякъ улупну. Исахан бабкан шлу вахтна, дугъан абйир-бабар Табасаран райондин ЦIанак гъулаъ яшамиш шулайи. Дугъан аьхю баб азербайжан дишагьли, хъа аба Заан Ярккан вуйи. Чаз туву тербияйиинди гъи Исаханди ва дугъан уьмрин юлдаш Саидайи чпин веледар Камилла, Эльхан ва Аьшурхан аьхю апIура. Исахан дилаварчи кас ву. Дугъу Иваново шагьриъ ООО «КамиТекс парчйирин фабрика» ва хусуси мяишатариз, тешкилатариз палтар дирхру цех арццна. Думу тешкилатариъ 100-тIан артухъ пишекар гъуллугъчйир лихура. Дурарин тешкилатдиз парчйирин сурсат Китай, Узбекистан, Туркменистан, Таджикистан, Вьетнам, Индонезия, Беларусь гьюкуматарин чIатху техшкилатариан масу гъадабгъура. Чпи фабрикайиъ гъидирху хусуси тешкилатарин палтар ва гь.ж. Урусатдиъ ва багахь харижи уьклйириъ масу тувра. Асас вуди дурариз «РЖД», «Газпром», металлургияйин комбинатариан ва жара чIатху тешкилатариан заказар гъюру. Хъа Исаханди чан ляхин 20 йис улихьна, палтар дирхру кьюб машин масу гъадагъбалан ккебгънийи. Ва йислан-йисаз яваш-явашди дугъу чан бицIи мяишат яркьу гъапIну.
Ивановский областдиъ айи дагъустанлуйирин жямяаьтлугъдин кIулиъ айи Шамил Гьяжиевди къайд гъапIганси, му региондиъ Исахан варитIан ужудар касарикан ужурси, гьюрматлударикан гьюрматлурси гьисаб апIура.
«Гьамушваъ ич арайиъ гьамцир гъардаш, ватанагьли айивалиин учу дамагълу вуча. Дугъу суткайин фунуб вахтна вушра чахьна илтIикIу касдиз кюмекнан хил гьачIабккуру. Дугъу, гьам чан ватандашаризси, гьамушваъра хайлин инсанариз кюмек гъапIну. Ивановойиъ дугъаз гизаф аьхю гьюрмат а. Мушваъ учу, дагъустанлуйир, ич абйир-бабарин аьдатар уьрхюри, саб хизанси албагну яшамиш шулача. Дагъустанлуйир, чиб наан яшамиш шулашра, чпин аьдатар, чпин культура, чIал, гъиллигъ уьбхюз чалишмиш шулу. Гьацдарикан ву Исаханра. Узуз Ивановойиъ айи Исахандин имбу гъардшаризра, табасаранар Мурадхан Ханмягьямедовдиз ва Гьябиб Гьяжимягьямедовдиз баркаллагь ва чухсагъул пуз ккундузуз»,
– гъапну Шамил Гьяжиевди.
Узу, Шамилин тярифнан гафарихъ хъпехъури, гьякьикьатдиъра ватандихьна, инсанарихьна вуйи ккунивалиинди, рягьимлу ляхнариинди юкIв абцIнайи Исахан Сафарчиевсдариз ухшар инсанари ихь уьмур балгурайивалиин, дурар ихь веледаризра чIиви чешне вуйивалиин нубатнан ражари инанмиш гъахьунза.
