Ноябрин 3-диан 8-пи йигъазкьан ихь уьлкейиъ онлайн-форматдин къайдайиинди вари Урусатдин «Этнографияйин аьхю диктант – 2020» акция кIули гъябгъиди. Акция гъабхури хьубпи раж ву.

 

Дидиъ фунур вушра касдихьан иштирак’вал апIуз шулу.

Вари халкьарин «Этнографияйин аьхю диктант» акция – культура-йинна мярифатнан серенжем ву. Диди Урусатдиъ яшамиш шулайи халкьарикан, кюгьне культурйирикан ва аьдатарикан ватандашариз айи аьгъювалар ахтармиш апIуз мумкинвал тувди.

Акцияйиъ иштиракчи хьпан бадали, www.miretno.ru сайтдиъ учIвну ккунду. Гьадушваъ анкета абцIуб ва табшуругъариз жавабар тувуб лазим ву.

Акцияйин иштиракчйириз 30 суал тувди, дурарикан 10 суал иштиракчи фуну йишв’ан вуш, гьадму региондиз хас вуйидар хьиди. Суалар ва табшуругъар зиихъ улупнайи сайтдиъ ноябрин 3-пи йигъан хьиди.

«Ич метлеб – акцияйин кьяляхъ Урусатдин гьарсар ватандашдик чан ата-бабйирин тухум-кюлфет, милли аьдатар ахтармиш ва аьгъю апIуз аьшкь капIувал, багахь яшамиш шулайи гъуншйирин аьдатариин маракьлу апIувал вуйич. Миллетарин арайиъ сар-сарикан фукьан гизаф аьгъювалар гъахьиш, дурарин сар-сарихьна вуйи гьюрмат, сабвал ва дуствал гьадмукьан мюгькамра шулу»,

– гъапну миллетарин ляхнариз лигру Федералин агентствойин кIулиъ айи Игорь Бариновди.