21-пи октябриъ Каспийск шагьриъ айи Аьли Аьлиевдин ччвурнахъ хъайи спорткомплексдиъ нубабнан ражари «Дагъустандин теплицйир» Ассоциацияйи тешкил дапIнайи «Даг – Агро 2020» выставка гъабхьну. Выставкайиъ, теплицйириз лазим вуйи шей’ар, авадлугъар улупури, Урусатдин 60-тIан артухъ регионариан карханйир иштирак гъахьну.
Серенжем ачмиш гъапIур РД-йин гъулан мяишатдин ва ипIру – убхъру сурсатарин министрин сарпи заместитель Шарип Шарипов вуйи. Чан удучIвну улхбаъ дугъу гъапиганси, вари Урусатдиъси, Дагъустандиъра мейвйир гьясил апIбан циркил ужуди артмиш шула.
«Аьхиримжи вахтна республикайин хайлин районарин мяишатари теплицйириъ мейвйир гьясил апIбиин жанлуди ляхин гъабхура. Теплицйириъ мейвйир гьясил апIбаан Дагъустандиз айи аьхю мумкинваларикан гъи гьаму выставкайиъ ихь гьюкуматдин варитIан аьхю, машгьур, ужуб авторитет айи карханйир иштирак шулайивали кIура. Дурар мина гъювалин асас метлеб — теплицйириъ мейвйир гьясил апIбаъ ухьуз адру тажрубайихъди, ишлетмиш дапIну ккуни шей’арихъди таниш апIувал ву. Гъи учву учухьна гъюб’ин гизаф рази вуча. Учву му выставкайиз гъюб’инди республикайиъ теплицйириъ мейвйир гьясил апIувал артмиш апIуз хъанара артухъди мумкинвалар хьиди кIури, умудлу вуза.
Гьар йисан Урусатдиз харижи гьюкуматариан теплицйириъ гьясил гъапIу 0,5 миллион тонна мейвйир хура. Му ляхниъ (теплицйириъ гьясил дапIну, жара йишвариан хурайи мейвйирин кьадар кам апIбаъ) Дагъустан Республикайи ужуди зегьмет зигура. Дагъустандиъ гьясил апIурайи, гизаф витаминар кайи ал рангнан памадрарин вари ихь уьлкейиъ аваза абхъна. Думу ляхин ухьу хъанара ужуди тамам апIидихьа»,
— гъапну Шарип Шариповди.
Выставкайиз набататарин ва чIивишнарин уьмрин натижайиъ арайиз гъафи, шид жюрейиз илтIикIнайи пейин хьади Москвайин дуфнайи, Био Эра Групп компанияйиан кIулиъ айи Александр Ермаковди къайд гъапIганси, дурар Дагъустандиъ гьар йисан кIули гъябгъюрайи му выставкайиз гъюри сабпи раж ву.
«Учу, гъулан мяишатдин итIру сурсатар ужуди гьясил апIбан бадали, чIивишнарин уьмрин натижайиъ арайиз гъафи, руг мянфяаьтлу апIру пейин гьязур апIурача. Урусатдин саки вари регионариъ ич сурсат ишлетмиш апIура. Гьелелиг Дагъустандиъ Био Эра Групп компанияйин сурсатар масу туврайи вакилар адаршра, мушваъ, арачйирихьан тина масу гъадабгъури, ич пейин ишлетмиш апIура. Гъи гьаму выставкайиъ иштирак хьпаз лигну, гьамусдихъан тина Дагъустандиъра ич компанияйин вакилар хьиди кIури, умуд кивраза»,
— гъапну выставкайин иштиракчийи.
Гьаму жюрейин пейин хьади выставкайиз дуфнайи СоюзХим компанияйин Дагъустандиъ айи вакил Жамал Хангишиевдира чпи гьясил апIурайи, шид жюрейиз илтIибкIнайи пейиндикан гъапнийи.
«Дагъустандиъ СоюзХим компанияйин вакиларди лихури, сад йискьан шулайич. Гъийин йигъаз Урусатдин 44 региондин гъулан мяишатдин набататчивалин цирклиъ ич компанияйин сурсатар ишлетмиш апIура. Гъи выставкайиъ иштирак хьпан асас метлеб – учу гьясил апIрайи пейиндихъди инсанар хъанара артухъди таниш апIувал ва муштарйир агувал вуйич.
Къайд апIуз ккундузки, ич компанияйи гьязур апIурайи пейин теплицйирин ругар мянфяаьтлу апIбаъси, ачмиш вуйи бистнар, хутIлар, багъариъра ишлетмиш апIуз шулу. Мисалназ, Дербент райондин «Татляр» агрофирмайи гъи учу гьаму выставкайиъ улупурайи сурсат тIумутIчивалин цирклиъ ишлетмиш апIура. Гьацира СтIал-Сулейман райондин «Полоса» ООО-йира учухъди ляхин гъабхура. Хайлин хусуси мяишатарира ич сурсат жилар мянфяаьтлу апIбаъ ишлетмиш апIура»,
— къайд гъапIну Жамал Хангишиевди.
Ав, выставкайиъ теплицйириъ ишлетмиш апIру фицдар ккундуш шей’ар, авадлугъар, сурсатар айи. Гьятта кивнайи набататарихъ автомат жюрейиинди, янаки жилик ламвал кимиш, камдарш аьгъю апIури, шид хъубзру аппаратарра, литIнариинди шид хъубзруган ишлетмиш апIру, шид ктIубццру аппаратарра айи. Гьадму вари шей’ар Дагъустандиъ гъулан мяишатдин набататчивалин цирклиъ ляхин апIурайи касар дурарихъди таниш апIуз духнайидар вуйи.
