Тамила Шихиевнайин хизан – духтрарин хизан ву. Дугъан адаш Шихи Гьясратовди чан вари уьмур Табасаран райондин больницайиъ силбар сагъ апIру духтирди лихури гьапIну.
Хъа дада Муслимат Гьясратова чан ляхин апIуз хъюгъхъан тина Табасаран райондин Хючнаъ айи сабпи нумрайин мектебдиъ фельд-шерди лихура. Дугъан гъардаш Мурад Гьясратов Табасаран райондин больницайиъ духтирди, чи Гьялимат Гьясратова Мягьячгъала шагьриъ акушер-гинекологди, хъа тмуну чи Замира Гьясратова бицIидарин багъдиъ духтирди лихура. Тамила Шихиевнайин хизандин вакиларра духтрар ву. Дугъан жилир Хикмет Гьямзатов Табасаран райондин больницайин клиникайин лабораторияйин гъуллугъчи ву, хъа дугъан шуру Лейла Гьямзатовайи, Мягьячгъала шагьриъ интернатурайиъ урхури, чав гъадагъу аьгъювалар практикайиъ мюгькам апIура.
Тамила Шихиевнайихъди узу (макьалайин автор) Хючнаарин кьялан мектебдиъ 1978-1980-пи йисари 9-пи ва 10-пи классариъ саб классдиъ урхури гъахьунза. Гьеле мектебдиъ урхури имиди, думу касдин инсанарин сагъламвалин гъаравлиъ хьуз кьастар айи. Дугъан кIваъ медицинайин рякъюъди гъягъюз ккунивалин гьиссар ачухъ хьувал жвуван тухумдиъ гизаф духтрар айиваликан асиллу гъабхьнийи. Думу вахтари дугъан дада Муслимат халара гьадму мектебдиъ духтирди лихурайи. Мектебдиъ урхури имиди чпин дадайиз кюмекар апIури, Тамила духтирвалин пишейихъди таниш гъахьнийи. Гьаци дугъу чпин духтрарин хизандин пишера ктабгъну.
Дугъан адаш Шихи халуйиканра зат дарпиди гъузуз шулдар. Улихьна вахтари шяргъяр-силбар сагъ апIру духтрар цIибтIан адайи. Шихи халуйи ляхниъси, хулаъра ляхин апIури шуйи. Дугъахьна гьацIишваринганра ярхла гъулариан шяргъяр иццури аьгь апIуз даршулайи касар гъюри шуйи. Му кас зат инжик шлур дайи. Дугъу гъюдли гафар апIури, шяргъяр уьчIюгъюбкьана аьгъю шулдайи. Швнуб-сабан узура думу кас йишвандин вахтна инжик гъапIнийза. Думу вахтна кьюр касди вари Табасаран райондиъ айи аьзарлуйир сагъ апIуйи. Хъа гьамус силбар сагъ апIру духтрар гизаф духьнашра, саспи духтрари сагъ гъапIу силбарра кьаназ гъузудар.
Чан абйир-бабариканси, Тамилайиканра инсанар гизаф разиди ву. Тамила Шихиевнайи хайлин аьзарлу дишагьлийириз хъайивал гъапIну. Гьар йигъан Тамила чан ляхниъ гизаф кьадар инсанарихъди аьлакьайиъ шулу. Чахьна илтIикIу инсанарихъди дугъу гъюдлиди ва сабурлувалиинди гаф-чIал апIуру. Тамилайи узухъди гъубху сюгьбатнаъ гьамци къайд гъапIнийи: «Аьзарлуйирикан улхуруш, ихь табасаран халкь лап сабур хъайиб, чиб-чпиз гьюрмат апIруб вуйихь, гьаддиз учухьна илтIикIру аьзарлуйирра ич гъавриъ ахърудар шулу. Хъа ич терефнаан учура дурариз медицинайин кюмек заан дережайиъди тувуз чалишмиш шулача.
Гьаму коллективдин арайиъ ляхин апIури, 30 йискьан шулайиз. Ужуб, албагу, сар-сариз кюмек апIру коллектив ву.
Аьхиримжи йисари медицина улихь дубшнайи вахтна,больница цIийи техникайихъди тямин апIбан хайлин месэлйир шула. Ухьуз рябкъюрайиганси, цIийи полик-линика тикмиш апIувалира аьзарлуйириз ва дурар кьабул апIру духтрариз хайлин рягьятвалар хьуз гъитну. Ляхнин вахтна саб дакьикьайиъкьан азад вахт шулдар, гьаз гъапиш анализар апIру отделениейиз илтIикIру инсанарин кьадар лап аьхюб вуди шулу. Агьалйирин гъуллугъар гьуркIру вахтна, жвуван кефйир адрувал улулупди ва хусуси месэлйир кIваълан гьаъну, ляхин апIувал лазим шулу».
Тамила Гьямзатовайиз гележегдиъра ляхниъ хъуркьувалар, хъа, аьзарлу духьну, дугъахьна илтIикIурайи инсанарин кьадар цIиб хьувал ккун апIурхьа.
Тамила Гьямзатова 1963-пи йисан Табасаран райондин Хючна гъулаъ бабкан гъахьну.
1980-пи йисан Хючнаарин кьялан мектеб ккудубкIбалан кьяляхъ, думу сад йисан «Хучнинский» совхоздиъ рабочийди лихури гъахьну.
Гьадму йисан Тамила Шихиевна Дагъустандин Гьюкуматдин медицинайин институтдин акушервалинна гинекологияйин факультетдик урхуз кучIвру ва 1989-пи йисан думу ккудубкIуру.
1989-1990-пи йисари дугъу Дербент шагьрин кьялан больницайиъ айи интернатурайиъ урхури, гьадушваъ ляхинра апIури гъахьну.
Хъа 1990-пи йисхъан мина Тамила Гьямзатовайи Табасаран райондин больницайиъ акушер-гинекологди ляхин апIура.
Чан ляхнин вазифйир лазим вуйи къайдайиинди тамам апIувализ лигну, Тамила Шихиевнайиз 2009-пи йисан 28-пи октябриъ Дагъустан Республикайин лайикьлу духтир кIуру ччвурра тувна. Гьацира думу жюрбежюр гьюрматнан грамотйирин, пешкешарин сагьибра ву.
