Октябрин 24-пи йигъан Мягьячгъалайиъ Иса Пайгъамбрин(с.аь.в.) ччвурнахъ тикмиш апIурайи Аьхю мистаъ, Раби-уль-Авваль вазлиз бахш вуди, Табасаран райондин агьалйирин мажлис кIули гъубшну. Райондиан дуфнайи хялариз мистан айитI экскурсия тешкил гъапIнийи. Гьацира дурариз тикмиш апIурайи мистан метлебарикан ва думу арайиз гъюбан тарихдикан ктибтнийи.

 

Жямяаьт серенжем кIули гъабхру йишвахьна уч гъабхьиган, гирами Кьур’андиан сурйир урхбиинди мажлис ачмиш гъапIнийи. Уч духьнайидарин улихь РД-йин Муфтиятдин ЮТО-йиъ вари ихтиярар тувнайи вакил Гьюсейн Гьяжиев удучIвну гъулхнийи. Дугъу Табасаран райондин агьалйири мист тикмиш апIбак уртахъди киврайи пайнакан гъапнийи ва чан улхувал чухсагъул мялум апIбан кагъаз тувбиинди ккудубкIнийи.

Серенжемдиъ Мягьяммад Пайгъамбрин (с.аь.в.) уьмрикан ктибтру нашидар гъурхнийи.

Мажлисдиъ удучIвну гъулху ДГИ-йин экономикайин кафедрайин доцент, педагогикайин илмарин кандидат Алаудин Аскеровди чан улхбаъ къайд гъапIганси, аьгъювалар гъадагъбан ляхниъ диндин тарих аьгъю апIувал чарасуз лазим ву.

Исламдин илмарин доктор Рашид Аьлимурадовди чан удучIвну улхбаъ Аллагьдин Пайгъамбрикан (с.аь.в.) ва гьарсар мусурман касди дугъан уьмрин рякъ аьгъю дапIну ккуниваликан ва думу чешнеди дидисну ккуниваликан гъуапнийи.

«Пайгъамбрихьна (с.аь.в.) вуйи ккунивал себеб вуди, Табасаран райондин жямяаьт албагну гьаму Центр тикмиш апIбан ляхниъ иштирак шула», – къайд гъапIнийи чан удучIвну улхбаъ Табасаран райондин имамарин Совет-дин председатель Ансар Рамазановди ва тикилишчивалин ляхниъ артухъси иштирак гъахьидариз чухсагъул мялум апIбан кагъзар тувнийи.

Мажлисдин аьхириъ Ансар Рамазановди вари уч гъахьи касариз ва рягьимлувалин ляхниз ужуб кюмек туври, амма жюрбежюр себебар ади мажлисдиъ иштирак хьуз дархьидаризра чухсагъул мялум гъапIнийи.