Октябрин 28-пи йигъан Хив райондин культурайинна рягьятвал гъадабгъру центриъ гъулан дишагьлийирин форум кIули гъубшну. Урусатдин дишагьлийирин Союздин 30 йисандин юбилей къайд апIбан лишниккди кIули гъубху му серенжемдиъ Дагъустандин дишагьлийирин Союздин председатель Интизар Мамутаевайин регьберваликкди республикайиан хайлин хялар иштирак гъахьну.
Форумдиз гъафи хялар ва дидин вари иштиракчйир къаршуламиш апIури, Хив райондин глава Ярмет Ярметовди уьлкейин саламатвал уьбхбаъ дишагьлийи уйнамиш апIурайи роликан, гьюкуматдин ва кьатI’иди Хив райондин артмиш’валик дишагьлийи лайикьлу пай киврайиваликан яркьуди гъапну.
– Дишагьлийи – дадаси, уьмрин юлдашси, чиси, жвуван ришси – гьарсар касдин уьмриъ важиблу йишв бисура. Жиниб дар, хизандиъ умунвал яратмиш апIувалра асас вуди дишагьлийикан асиллу шула.
Ав, улихьна вахтариси дарди, гьамус дишагьлийир уьмрин вари терефариъ иштирак шула: гъийин девриъ дишагьлийири жилижвуварихъди сабси гьюкмин цирк-лиъра, дилаварчивалин рякъюъра ужудар хъуркьувалар улупура. Амма, дупну ккундуки, му улупбари дурар я хизандин гъайгъушнарихьанра азад апIурадар. Вари месэлйир гьял апIуз хъуркьбаъ дугъан кьувватра жин шула. Му жигьатнаан аьхир адрубкьан улхуз шулу.
Уьлкейин гьякьикьат фик-риз гъадабгъну, дарпиди гъитуз шулдарзухьан. Варибдин эвел ва бина – хатIасузвал ва саламатвал ву. Аьхирмжи йигъари ухьуз багахьлу гьюкуматариъ арайиз дуфнайи аьгьвалатну гьарсар фагьумлу кас пашман апIура. Гьюрматлу дишагьлийир, дадайин гаф фунуб вахтнара марцциб ва гирамиб ву. Учвуз жямяаьтлугъ хатIасузвал уьбхюз, веледар бедбахтваларихьан ярхла апIуз аьхю кьувват ачвуз. Мюгькам хизан – мюгькам уьлкейин диб ву, хъа хизандиъ, хулаъ мясляаьт хьувал учвкан асиллу шула. Хизандиъ умунвал дубгуз мигъитанай. Республикайин саламатвал уьбхбаъ дадйирин уьмуми гафназ дерин мяна а. Абйири кIуруганси, сатIивали дагълар дагъитмиш апIуру. СатIивали ихь веледар, му назук дюн’я инсафсузваларихьан уьбхрувалихъра хъугъраза, – къайд гъапIну Ярмет Ярметовди, форумдин иштиракчйирихьна илтIикIури.
Серенжемдиъ удучIвну гъулху Интизар Мамутаевайи уч духьнайидариз чпи республикайиъ, хъа Хив райондин дишагьлийирин Советдин кIулиъ айи Зумрия Сеидягьмедовайи – чпи райондин аьтрафариин гъабхурайи ляхникан ктибтну. Вари улхбарин асас мянара жямяаьтлугъ хатIасузвал уьбхювалихъди ва артмиш шулайи наслар писваларихьан, чиркинваларихьан ярхла апIувалихъди аьлакьалу вуйи.
Серенжемдиъ удучIвну улхбарин аьхириъ район артмиш апIбаъ натижалу ляхин гъабхурайи саб жерге дишагьлийир «Хивский район» МО-йин администрацияйин терефнаан Гьюрматнан грамотйир тувбиинди лишанлу гъапIнийи.
