Улихьна йигъари ич арайиъ гъабхьи сюгьбатнаъ Гьюкуматдин Табасаран драмайин театрин директор Аьлимурад Аьлимурадовди чан коллективдин сабваликан, артистарин бажаранваликан, сар-сарихьна айи гьюрматнакан ва дурарин ляхнихьна вуйи жавабдарваликан ктибтнийи. Узу дугъкан театриъ хайлин йисари лихурайи Гюльнара Аьгьмедхановайикан жаради кьюб гаф пуб ккун гъапIнийза.

 

 

«Гюльнара Табасаран театрин бажаранлу артист ву. Театриъ думу 2012-пи йисхъан мина лихура. Гюльнара чав уйнамиш апIру гьарсаб ролихьна дериндиан гьязур шулу. Узуз коллективдин ва театрин режиссерин терефнаан Гюльнарайикан анжагъ разивалин ужудар гафартIан гъеерхьундарзуз. Мидланра гъайри, Гюльнарайи ихь халкьдин кюгьне мяълийирра устадвалиинди тамам апIуру. Дугъаз милли палат, милли мяълийир, мукьмар йивру кюгьне алатар гизаф кьабулди ву. Учуз иштирак хьуз теклиф гъапIу фунуб машквризра думу, чан успагьи милли палат алабхьну, гьаммишан гьязурди шулу. Гюльнара ужуб хасиятнан, сабурлу, халис табасаран дишагьли ву», – къайд гъапIнийи театрин директор Аьлимурад Аьлимурадовди.

Гюльнара Аьгьмедханова Таба-саран райондин ЧIвулатI гъулаъ бабкан гъахьну. Мектеб ккудубкIган, дугъу Саратовский областдин Энгельс шагьриъ педучилищейиъ гъурхнийи. Хал-хизан ккебгъбан кьяляхъ, Гульнара йирхьуд йисан чан багъри гъулан мектебдиъ, хъасин Норильск шагьрин мектебдиъ ккергъбан классарин мялимди гъилихну. БицIи вахтналан дурарин хизан Норильск шагьриан Дербентдиз удубчIвну гъюру.

«Дербент шагьриъ базариан хулаз гъягъюрайиган, саб бицIи дараматдик «Гьюкуматдин Табасаран драмайин театр» дибикIну гъябкънийзуз. Узу думу йигъхъан мина театриъ лихбакан кIваъ хиялар уьрхюри гъахьнийза. Ич язна Кьудратдин халуйиз йиз кIваъ айи хияларикан хабар гъабхьнийи, ва дугъан кюмекниинди узу театриз кьабул гъапIнийи. Дидхъан мина миржид йис гъубшну. Дишди гъапиш, ич хизандин вари вакилар искусствойихьна, культурайихьна, мяълийир апIбахьна лап багахь ву. Рябкъру гьялариан, думу мукьмарихьна вуйи сюгьюрлу гьиссар дадайихьанна абайихьан учухьиндира гъафну. Мектебдиъ урхурайи йисари вари серенжемариъ жанлуди иштирак шуйза, мяълийир апIуйза, хъа мялимди лихурайи йисари узуз мектебдиъ художествойин самодеятельностдин кружокар гъахувал табшурмиш гъапIнийи. Дербентдиъ Табасаран театриъ ляхниъ учIвбахъди сабси, йиз чи Эльвирайихъди сатIиди сумчрариз мяълийир апIузра гъягъюз хъюгънийча. Хъасин музыкайин хусуси десте тешкил гъапIнийча. Театриъ 10-тIан артухъ спектаклариъ иштирак хьуб кьисмат гъабхьунзуз. Гьамусяаьт учу тазади дивнайи, «Миржир дишагьли» кIуру спектаклиъ узу Пьеретта кIуру дишагьлийин роль уйнамиш апIураза. Думу роль узу уйнамиш гъапIу роларикан варитIан кьабулди вузуз. Ич театрин режиссери гъядябгъну, узухьна хайлин йисари йиз кIваъ айибсиб роль тувну. Узуз узу уйнамиш апIурайи игит кьабулдира вузуз, бязиган – даккундира. Дугъан уьмур арабир йиз уьмрин дюшюшарихъдира теври шулза», – ктибтура Гюльнарайи.

Гюльнарайин дадайиз Багьар, хъа адашдиз Къурбан кIуру. Адаш сифте ЧвулатI гъулаъ мялимди лихури гъахьну. Сечкйириъ думу гъулан сельсоветдин председателди ктагъуру. 2016-2018 йисан думу гьадушваъ гъилихну. Багьар халара колхоздиъ гьаммишан ляхнин улихь хьайи дишагьлийирин цIарнаъ шуйи. Дурарин аьхю аба Абас халу думуган колхоздин бригадир вуйи. Аьгьмедхановарин хизандиъ 6 велед гъахьну: кьюр бай ва юкьур риш. Къурбан халуйи ва Багьар халайи дурариз варидариз ужуб заан образование тувну. Баяр военный гъуллугъчйир гъахьну, хъа шубари варидари мялимвалин пише ктабгънийи.

«Абайиз чюнгюр айи. Гъиси кIваин илмийиз, ич хулаъ хялар адру вахт гьеле-меле шулдайи. Гьар хябяхъ концертдиз ухшар ади гъябгъюйи. Абайи чюнгюр йивуйи, хъа дадайи халкьдин мяълийир апIури шуйи. Йиз аьхюнур гъардши гьамусра музыкайин швнуб-саб алатдиин мукьмар йивуру. Дадайихъан учура мяълийир апIуз гъудубгънийча. БицIи вахтналан узузна Эльвирайиз сумчриъ мяълийир апIуз теклифар гъюз хъюгънийи. Думуган шубар мяълийир апIуз гьеле-меле гьаъри шулдайи. Табасарандин машгьур артист Навруз Аскеров ич хулаз миннатар апIури гъафиган, дадайи гуж-балайиинди Эльвира гьаъри гъахьну. Хъа узура сумчрариъ мяълийир апIуз гъягъбакан дугъаз гафкьан деебхьну ккундайи. Узуз халкьдин мяълийир гизаф кьабулди вузуз. Марьям Къазиевайи табасаран халкьдин мяълийин мяна, дидин рюгь, хасият тамашичйирихьна рубкьуз, дурарихьди гьисс апIуз гъитбан къайда лап кьабулди вузуз. Гъийин йигъаз дугъуси марцциди милли мяълийир апIрур адар. Дугъан мяъли апIбан саягъ, дугъу сягьнайиин ва уьмриъ учв гъахру къайда, дугъан сес гъеебхьиган, узузра артист хьуз ккун гъабхьнийзуз. Узу гьаммишан дугъан мяълийирихъ хъпехъури шулза. Мидланра гъайри, ихь машгьур шаирар Гюльбике Уьмаровайин, Эльмира Аьшурбеговайин, Абдурягьим Абду-рягьмановдин, Аьлимурад Аьлимурадовдин шиърар урхузра аьшкь ади шулиз. Сабпи йиз мяълийин гафар гъидикIурра ихь театрин директор Аьлимурад Аьлимурадов вуйи. Дугъаз чухсагъул пуз ккундузуз. Ич коллективдиъ сабвал, гьюрмат, сар-сариз кюмекнан хил гьачIабккувал – вари а. Узу гъавриъ адрахъруб гьерхри, РД-йин халкьдин артист Гюльнисе Агъаевайихьна, Табасаран театрин режиссер Жамбулат Гьябибовдихьна, директор Аьлимурар Аьлимурадовдихьна ва жара юлдшарихьна илтIикIури шулза. Дурари узуз гьаммишан кюмек апIуру. Вуйибси дупну ккундуки, театр артмиш, табасаран культура за апIбан рякъюъ театрин кIулиъ айидари баркаллу зегьмет зигура. Театриз хусуси режиссер айивал – аьхю девлет ву. Жамбулат Гьябибов гьадмукьан сабурлу, варидарихьна гьюрматлуди янашмиш шлу, фунур артистдизра кюмек тувру кас ву. Йиз коллективдин узухьна вуйи мани янашмиш’вализ, гьюрматназ чухсагъул пуз ккундузуз. Театр багъри хал гъабхьунзуз. Хъа му аьхю бахтси гьисаб апIураза», – гъапнийи сюгьбатнан аьхи-риъ Гюльнарайи.

Гьамусяаьт Гюльнара чан бай Арсендихъди Дербент шагьриъ яшамиш шула. Дугъан театриъ лихбакан вуйи умудар тамам гъахьну, гьамус дугъу бализ аькьюллу, успагьи сар риш дагну, дурарин хал-хизан ккебгъбакан фикир апIура. Арсенди Мягьячгъала шагьриъ заан технический образование гъадабгъна, ва багарихьди ухьу дугъан сумчрин хялар шлувалик миж кивдихьа.