Чвлин бегьер уч дапIну ккудубкIурайи вахт улубкьна. Ноябриъ ихь республикайин кьибла терефнаъра мархьар ургъуз хъюгъру. Дербент райондиъ гьаму йисан ер-йимишди ужуб бегьер тувну. Хъа Дагъустандин йимишарин сурсатназ наан вушра ужудар муштарйир дихъуру.
Улихьна йигъари Дагъустан Республикайин гъулан мяишатдин ва ипIру-убхъру сурсатарин министр Абзагьир Гьюсейнов Дербент райондиз гъушну. Думу багъбанчивалин «Анжелина АТР» мяишатдин ляхнихъди таниш гъахьну. Мяишатдиъ 240 гектариъ гьамусдин деврин технологйириинди ер-йимиш тувру гьарар кивна. Багълариъ гьарсаб гьариз штун литIан деебтру гъурулуш албагна, шид уч апIру йишвар тикмиш дапIна, гъулан мяишатдин техникайихъди тяминвалра ужуб ву. Гьарсаб гектар жилиин 2 агъзуркьан гьар кивна, дурарин арайиъ вичун, хурмавдин, кумшарин, жихрарин. хуттарин ва гьацира жара йимишдин гьарар а. Гьамусяаьт кьанди хъуркьру сортнан вичар уч апIура.
Мяишатдин кIулиъ айи Аьбдусамад Гьяжиевди ктибтганси, гележегдин планариъ багълар кивнайи йишвар 500 гектариинакьан яркьу апIувал а. Хъа думу планар кIулиз адагъбан бадали жилин участок жара апIувал лазим ву.
Багъбанчивалин мяишатдин кIулиъ айирин гафариинди, йимишарин бегьер масу тувбахъди саб жюрейин читинвал адар. Йимишар саб йишв’инди аьхю кьадар масу ва тартиб апIуз гъадагърудар а. Мяишатдиъ уч гъапIу йимишарин бегьер уьбхюз шлу йишварра а.
