Улихьна йигъари Мягьячгъалайиъ ерлешмиш дубхьнайи Р.Н. Аьшурялиевдин ччвурнахъ хъайи Технический колледждиъ ухди пишекрар гьязур апIру центр (ЦОПП) ачмиш апIбан яркьу серенжем гъабхьну. Му шадлугънан серенжемдиъ РД-йин Правительствойин Председателин заместитель, республикайин образованиейинна илимдин министр Уммупазиль Уьмарова, РД-йин зегьметнанна яшайишдин артмиш’валин министр Изумруд Мюгьюдинова ва РД-йин мялуматаринна аьлакьйирин ва махлукьатлу коммуникацйирин министр Сергей Снегирев иштирак гъахьнийи.
Къайд дапIну ккундуки, му центр «Жигьил пишекрар» кIуру федералин проектдин ва «Образование» кIуру милли проектдин дахилнаъди РД-йин образованиейинна илимдин Министерствойи тешкил гъапIуб ву.
Серенжемдиз дуфнайи Уммупазиль Уьмаровайи мялум гъапIганси, ачмиш гъапIу ЦОПП-йин асас вазифа – региондин экономика армиш апIуз ужудар аьгъювалар, заан хъуркьувалар айи пишекрар гьязур апIувал ву.
«Му центр WorIdSkiIIs-дин стандартариинди вуйи гьаму деврин мультимедийный технологйириинди тямин дапIна, ва душваъ жюрбежюр яшарин инсанарихьан аьгъювалар гъадагъуз шулу. Янаки, урхуз ккуни касариз зат читинвалар адар.
Гьацира, пуз ккундузузки, гьамусдихъан тина ЦОПП-йи республикайин образованиейин жюрбежюр идарйирихъди ва дилаварчивалин карханйирихъдира сатIиди ляхин апIиди. Фицики му центрин пишекрари жюрбежюр карханйириъ лихурайи гъуллугъчйирин агъювалар за апIуз лазим вуйи программйир гьязур апIура», — гъапну министри.
Серенжемдин аьхири ЦОПП-йин директор Мафият Рягьмановайи дуфнайи хялар центриъ улупурайи аьгъюваларихъди таниш гъапIну.
ЦОПП-йин директори «Табасарандин нурар» газатдин вакилиз туву мялуматариннди, ЦОПП асас вуди республийиз кадрйир гьязур апIуз тешкил гъапIуб ву.
«Гьякьлуди гъапиш, ццийин январихъан мина ЦОПП-йи ляхин апIуз хъубгъна. Гъийин йигъаз хайлин хъуркьуваларра гъадагъна ва ляхин давам шула. Центр, республикайин гьюкмихъди, образованиейин идарйирихъди, жямяаьтлугъ тешкилатарихъди аьлакьа уьбхюри, сатIиди ляхин апIуз гьязур ву. Гьаци ляхин гъабхури, республикайин образованиейин къайда за апIидихьа.
Пуз ккундузузки, ЦОПП-йиъ 6 вазлин арайиъ аьгъювалар гъадагъуз шулу. Мушваъ, 7 йисандин яшнаъ айидарилан хъюгъну, пенсия гъадабгъурайи касариинакьан – варидариз урхуз мумкинвал тувра. Гьацира пишекарвал за апIуз ккунидаризра мушвваъ агъювалар гъадагъуз ихтияр тувра.
Гъийин йигъаз му центриъ технический колледждихъди сатIиди 17 пише тувра. Мина урхуз гъафи касариз техколледждин общежитиейиъ яшамиш хьузра мумкинвал а», – гъапнийи ЦОПП-йин директори.
Планарин гьякьнаанра директори мялуматар тувнийи. Дугъан гафариинди, дурариз мектебарихъди аьлакьйир уьхюз ккунди а, туврайи пишйирин кьадар артухъ апIузра планламиш дапIна.
