Дилаварчи дишагьли – мурар ихь арайиз тазади дуфнайи гафар ву. Гьамусяаьт 30% дилаварчи дишагьлийир бицIи дилаварчивалин цирклиъ лихура, ва дурари экономика артмиш апIуз хайлин кюмек тувра.
Йиз гъийин макьалайин игит – Табасаран райондин НичIрас гъул’ан вуйи, гьамусяаьт Каспийск шагьриъ яшамиш шули, дилаварчивалин ляхниин машгъул духьнайи Гюльнара Рамазанова ву. Гюльнара хайлин йисари мялимди гъилихну, хъасин, думу ариш-веришчивалиин машгъул гъахьну, ва гъи дугъкан гъудуркьу дилаварчи духьна. БицIи дилаварчивалин цирк-лиъ ляхин апIури, Гюльнарайин 6 йискьан ву. Дугъу чан ляхин, учв яшамиш шулайи шагьрин базариъ дишагьлийирин палтар масу тувру саб бицIи тукан ачмиш апIбалан ккебгъну.
«Узу аьдати табасаран хизандиъ бабкан гъахьунзу. Йиз адашдина дадайи учуз – чпин вари веледариз – заан образование тувну. Гьеле узу бицIи риш вуйи вахтарихъан мина алверин цирклихъди таниш вуйза. Йиз дадайи гьадму вахтари, Бакуйиан палат хури, Каспийск шагьрин базариъ масу туври шуйи. Дада мутму хуз гъушиган, дугъхъанди палтар масу туври дусрур гьаммишан узу вуйза. Белки, гъи узу дадайин ляхин давам апIурашул?!»
– кIура Гюльнарайи.
«Гьамусяаьт Каспийск шагьриъ «White house» ччвур алди 5 тукан арццназа. Дюзди гъапиш, ляхин ккебгъру вахтари, думу кIулиз адабгъуз узхьан шуйкIан кIури, гьаммишан фикрарикк ккахъри гъахьунзу.
Хъа магьа гъи, туканарси, узу палтар дирхру цехра ачмиш дапIназа. Учу асас вуди масу туврайи палтар ич цехдиъ дирхурайидар вуйич. Душваъ ужуб тажруба айи пишекрари ляхин апIура.
Гъи йиз хиликк 25 касди сатIиди ляхин гъабхура. Ляхнин натижйирра ужудар вуйич, хъуркьуваларра ачуз. Йиз «White house» ччвур тувнайи туканарин жерге хайлин касариз таниш ву. Саб Каспийск шагьрианси, Дагъустандианси, гьятта жара гьюкуматарианра учу гьясил апIурайи палтариз муштарйир шулу. Дурариз масу гъадагъурайи палтар почтайиъди хътаурача. Хъа Мягьячгъала, Каспийск шагьрариан вуйи муштарийихьна кьабул гъабхьи палат фуну вахтна вушра ич курьери чпин хулазкьан гъабхуру», – ктибтура Гюльнарайи.
Коронавирусдихъди аьлакьалу вуди арайиз дуфнайи читинвалар Гюльнарайира бегьемди гьисс гъапIну. Дугъан гафариинди, вирусдихъди аьлакьалу ахтармиш’валин серенжемар дилаварчивалин цирклиъ гьамусра гъягъюри ими.
«Хьадукран вазариан хьадазкьан ич туканар хъяркьнайи. Узухь лихурайи касар маважиб адарди гъитуз шулдайи, фицики дурарикан хайлиндар пул туври жарадарин хуларикк деънайидар, бицIидар хъайидар ву. Му читин аьгьвалатнаан удучIвбан бадали, учу, инстаграмдиан заказар кьабул апIури, лихуз хъюгъюнча. Дюзди гъапиш, палат масу тувувал затра дабхъундариз»,
– кIура Гюльнарайи.
Гьамусяаьт му бажаранлу дишагьлийи Москвайиъра «White house» тукан абццуз йикьрар апIура. Багарихьди са-саб магазин Каспийскдиъ ва Дербент шагьриъ ачмиш апIуз планарик ка. Гюльнарайи мициб ляхин гъабхували хайлин касариз лихру йишварра ачмиш хьуз гъитра, экономика артмиш апIбак лайикьлу пайра кивра. Гъит Гюльнарайиз хъанара артухъ хъуркьувалар ишри.
