Улихьна йигъари вахтназ вуди Дагъустандин Главайин вазифйир тамам апIурайи Сергей Меликовдин регьберваликкди Дагъустандин Автономный Советарин Социалист Республика арайиз гъафихъан мина 100 йис тамам хьувал къайд апIбан гьязурлугвалариз бахш дапIнайи тешкиллувалин комитетдин заседание кIули гъубшнийи.
1921-пи йисан 20-пи январиъ вари Урусатдин ляхин кIули гъабхру Центральный Комитетди ДАССР арайиз хувалин гьякьнаан Декрет (къарар) кьабул гъапIнийи. Думуган республикайин дахилназ Авар, Гуниб, Дарги, Къазикъумугъ, Къяйтагъдинна Табасарандин, Кюре, Самур, Темир-Хан-Шура, Хасавюрт округар ва Каспий гьюлин гъирагъар тувнийи.
Заседаниейиъ Сергей Меликовди къайд гъапIганси, 100 йис улихьна кьабул гъапIу гьаму документ Урусатдихъди сатIиди саб уьлкейиъ яшамиш хьувалин тереф гъюбхю Дагъустандиз ва дагълу халкьариз мяналу гьядиса гъабхьну. Дагъустандин халкьар тарихдихьна гьаммишан аьхю гьюрматниинди янашмиш шулу. Юбилей багахь шулайиган, думу гьядисайихьна жямяаьтлугъдин маракьлувалра артухъ дубхьна. «Жюрбежюр теклифар ухьуз гизаф а, хъа 100 йис улихьна кIули гъубшу съезддиъ кьабул гъапIу къарар фикир тутрувди гъибтуз хай даршул, шадлу серенжемарихьна гьязур хьуз вахт ву», – гъапну республикайин кIулиъ айири.
Юбилей къайд апIбахъди аьлакьалу вуди адабгъу асас указдиин къул дизигна, тешкиллувалин комитет тешкил дапIна, кIули гъахру серенжемарин план тартиб дапIна. Машквар къайд апIбан гьадму пландиз асас вуди, гъюру йисан шадлугънан серенжемар, «гергми столар», выставкйир, фестивалар, жюрбежюр передачйир кIули гъягъиди.
«Республикайин гьюкмин вари органарикан, ерли самоуправлениейин органарикан, жямяаьтлугъ тешкилатарин, илимдин вакиларикан ДАССР арайиз дуфну 100 йис тамам хьувалин серенжемар гъахбан гьязурлугвалариъ иштирак хьувал ккун апIураза», – гъапну Сергей Меликовди.
Республикайин юбилейихъди аьлакьалу вуди асас фикир тарихдин мяна айи йишвар, культурайин ядиграр къайдайиз хувализ тувди.
Республикайин культурайин министерствойиъ ДАССР арайиз дуфну 100 йис тамам хьувалихъди аьлакьалу шадлугънан серенжемарин план тартиб апIбан месэлара гьял гъапIну. Республикайин культурайин идарйири кIули гъахру вари серенжемар яркьуди улупбан бадали, онлайн-программа тешкил апIувалин гьякьнаан теклифар дивну. Социалин сетариъ му месэлайин гьякьнаан сад йигъандин ва йишвандин арайиъ 10 агъзуртIан артухъ агьалйири чпин фикрар ачухъ гъапIну. «Гъийин девриъ интернетдиъ ляхин гъабхувал лапра важиблу ву. Музеяриъ, библиотекйириъ, театрариъ, образованиейин ва концертарин тешкилатариъ ляхин гъабхуз улупбан бадали, гьарсаб цирклиз жавабдар касар жара дапIнача. Идарйирин кIулиъ айидарикан гьаму терефнаан вуйи ляхниз фикир тувувал ккун апIураза», – гъапну РД-йин культурайин министр Зарема Бутаевайи.
Тешкиллувалин комитетдин нубатнан заседание гъюру вазлиъ кIули гъябгъиди. Душваъ, ДАССР-ин 100 йисандин юбилей къайд апIбахъди аьлакьалу вуди, муниципалитетариъ гъахурайи гьязурлугвалин ляхнарин гьякьнаан мялуматарихъра хъпехъиди.
