Дада – му гафназ аьхю мяна а.
Гьарсариз чан дада варитIан ккуни, гирами ва багьалу кас ву. Инсандин швнуд йис вушра, дугъаз гьарган дада герек ву. Гьаз гъапиш, дада гьаммишан хизандин, веледарин багахь хьайир, дурарин гъайгъушнаъ айир, фуну вахтна вушра кюмекнан хил гьачIабккурайир ву.
Дадавалин гьюрматлу вазифйир намуслувалиинди кIулиз адагъу, зегьметкеш дишагьлийир Табасаран райондиъра хайлин а. Гьаму шиклиъ ухьуз рякъюрайи Угълангерек бабра гьацдар дишагьлийирин жергейиан ву.
Угълангерек Гьяжииб-рагьимова 1943-пи йисан 1-пи июлиъ, Ватандин Аьхю дяви яцIаъ айи вахтна, Табасаран райондин Акъа гъулаъ бабкан гъахьну. Яшнакк ккуркьиган, Угълангерек Мягьмудовнайи Акъа гъулан агьали Ражаб Гьяжиибрагьимовдихъди хизан ккебгъну. Ражаб Гьяжиибрагьимов чан ляхин апIуз ккебгъхъан тина кечмиш хьайизкьан «Табасарандин нурар» газатдин шиклар йиврурди лихури гъахьну. Думу вахтна райондиъ шиклар йивру гьадму сар кастIан адайи. Ражабди гъиву шикил кIури, Табасаран райондиъ думу аьгъдру кас адайи. Дугъаз гьарган шиклар йивуз гъуларизра теклифар апIури шуйи.
Гьяжиибрагьимоварин хизан гъулаъ аьхю гьюрмат айи хизанарикан саб вуйи. Угълангерек бабу чан жилир Ражабдихъди 13 велед (9 байна 4 риш) аьхю ва тербияламиш гъапIну. Дурар вари, чпин хизанарра ккергъну, ихь уьлкейин жюрбежюр йишвариъ яшамиш шула. Йирхьур бали контрактдиинди РФ-дин Яракьлу Кьувватарин кьушмарин жергйириъ гъуллугъ апIура, хъа тмундар тикилишчивалин цирклиъ лихура. Гьамцдар ужудар, бажаранлу баяр уьрхбаз лигну, Угълангерек бабу гьаммишан армияйиан чухсагъул мялум апIбан кагъзар гъадагъура.
Угълангерек баб ярхи уьмрин рякъ ккадапIу кас ву. Гьелбетда, думу рякъюъ дугъаз читинваларра, дердарра, шадваларра алахьну. Амма дурарихьан бажарагълу дишагьли ккагъуз гъабхьундар.
«Хизандин гъайгъу зигувалилан савайи, Акъа гъулаъ гъахьи Аьгьметхановдин ччвурнахъ хъайи колхоздиъ 2 йисан, хъасин совхоздиъ 2 йисан гъулан мяишатдин чюлин ляхнар тамам апIури гъахьунза. Колхоздиъ дяхнар урзбаъ, бегьер уч апIбаъ, малар-марччариз хъайивал апIбаъ, яна вари ляхнариъ иштирак’вал апIури шуйза. Думугандин дишагьлийир ляхин апIуз дирбашдар, сабур хъайидар вуйи. Хъа гьамусдин деврин жигьиларихъди тевиш, дурарин арайиъ аьхю фаркьвал а. Думуганси дарди, гьамус дишагьлийириз хайлин гъулайвалар а. Мидланра савайи, 27 йисан Хючнаарин халачйир урхру цехдиъ халачачидира лихури гъахьунза. Артелиъси, хулаъра жвуван шубарихъдира хайлин халачйир, гьалвар гъурхунча. Халачйир урхбаъ хъуркьувалар улупбаз лигну, халачйирин фабрикайин руководствойи швнуб-сабан чухсагъул мялум апIбан кагъзар, пешкешар тувунзуз. Халачйир ришуз кюмек апIуз хуларизра кмиди гъягъюри, 13 йисанкьан халачийирин устадди гъилихунза. Дидланра савайи, хьайин атIнарра урхури шуйза», – кIура Угълангерек Гьяжиибрагьимовайи.
Гъийин заманайиъ халачичивал ихь арайиан дубграйиваликан, гьамусдин шубариз тек-бирра халачи убхуз аьгъд-руваликан Угълангерек бабаз аьхю хажалат ка. Думу 50 йисаъ ади пенсияйиз удучIвну, хъа 57 йисаъ ади дугъан жилир кечмиш гъахьну. Му касдин веледар чпин арайиъ лап гьюрмат айидар ву, дурари, сар-сариз кюмек апIури, варидариз цIийи хуларра гъапIну, вари эвленмишра духьна.
Къайд дапIну ккундуки, Угълангерек бабу гъизигу зегьмет гьюкуматдин терефнаан хайлин пешкешариинди лишанлу дапIна. Дугъаз «Зегьметнан ветеран» медаль, гьацира жара пешкешарра а.
Угълангерек бабан гьамусяаьт 78-йис ву. Дугъу кIурайиганси, инсандин уьмриъ варитIан аьхю девлет – ужуб, аьхю ва албагу хизан ву. Гъийин йигъаз дугъаз дициб девлет а: 13 велед, 35 худул ва 2 гудул. Дугъу учв бахтлу инсанарикан гьисаб апIура. Гьелбетда, чан уьмрикан, хизандикан, веледарикан думу гизаф разиди ву.
Угълангерек Мягьмудовна улубкьурайи бабан Йи-гъахъди мубарак апIури, дугъаз жандин сагъ’вал, хизандиъ хушбахтвал, веледарин терефнаан гьарган аьхю гьюрмат хьувал ккун апIураза.
