Ихь уьмур гъулай апIури, деврин цIийи технологйири аьхю мумкинвалар тувра. Амма, дурари уьмрин аьгьвалатназ хайирлу тясир апIурашра, гизаф дюшюшариъ ужудар терефарра зяиф хьуз гъитра.
Аьхиримжи вахтна гизаф инсанариз мобильный телефонар, DVD-плеерар, mp3-плеерар, пейджерар, компьютерар ва гьацира жара алатар адарди чпин уьмур рябкъюрадар. Миди деврин технологйири уьмриъ важиблу роль уйнамиш апIурайиваликанра кIура.
Саб терефнахъан му ужу ву. Йислан-йисаз технологйирин цирклиъ цIийи мумкиваларра арайиз гъюра. Миди ухьу саб йивш’ин дийигъну адруваликан, аьксина, сикин дарди артмиш шулайиваликан кIура. ЦIийи технологйир ихь уьмур шлубкьан гьии апIуз, инсанариз артухъ мумкинвалар тувуз арайиз хурайидар ву. Амма илимдинна ахтармишар гъахру цирклин аьлимари кьайд апIурайиганси, цIийи технологйириз, ужудар мумкинваларихъди сабси, харжи терефарра хайлин а. ВаритIан учIру месэлйирикан асасдар – табиаьтдиз тясир апIурайивал, гьава гъагъи ва чиркин дубхьнайивал, вари дюн’яйиъ манишин артухъ шулайивал ва гьацдар жарадар ву.
Аьхиримжи вахтна кIули гъахурайи илимдин ахтармишарин натижйири субут апIурайиганси, компьютерари ихь сагъ’вализ чIуруди тясир апIура. Гьаммишан компьютерихъ деъну айивали, мониторин улихь сикин дарди лихурайивали ихь бединдин ифи либхбан гъурулуш зяиф апIура ва уларин рябкъювал кьит хьуз гъитра.
Гьаддиз ухьхьан ихь гележегдин уьмриин умудлу хьуз шуладар. Деврин технологйир артмиш шула ва гележегдиъ вари дигиш хьуб мумкин ву. Гизаф инсанар кьадарсуз темплар духьна, тукандиз чпиз итIру сурсатар масу гъадагъуз гъягъюзра кмиди тIагърувал апIурайи касар хайлин а. Компьютерин технологйири, мидланра гъайри, агьалйириз гьякьикьи аьгьвалатнакан гьархуз, дурар видеойин тамширин асиллувалиъ ахъуз гъитра, интернетдин кюмекниинди лазим дару ва къурхулу инсанарихъди алакьайиъ учIвуз мумкинвал тувра.
Гьамусяаьт кючейиъ мобильный телефон хьтру живан имдар. Гьацира кючейиъ улихьна йисариси чан таярихъди жюрбежюр тамшир апIурайи бицIидар гьеле-мелера имдрувалин шагьидар шулахьа. Хъа, хулаз дуфну, компьютерихъ деу вахтна дурари рягьятвал ва саламатвал гьисс апIуру.
ЙицIуд-къад йисалан девир фициб шулуш, ухьхьан пуз хьибдар, амма гележегдин хайирлу мумкинваларик ва ужудар хъуркьуваларик миж кивдихьа.
