Ноябрин 27-диъ Хив райондин культурайин Хулаъ табасаран шаир Гюльбика Уьмаровайин 60-йисандин юбилейиз бахш дапIнайи мярака кIули гъубшну.
Му жюрейин серенжемариъ аьдат вуйиганси, райондин администрацияйин гьякимари, культурайин гъуллугъчйири, мялимари ва гъирагъдилан дуфнайи хялари шаирин адресназ хайлин мани ва тебрикнан гафар гъапнийи, табасаран чIал артмиш апIбаъ дугъан эсерари уйнамиш апIурайи роликан гъулхнийи.
Хив райондин кIулиъ айи Ярмет Ярметовди къайд гъапIганси, Гюлбика Уьмаровайин шиърар, гьарсар шаирин эсерарси, сад йигъандиз вуйидар дар, дурари урхурайидар йисариинди шад апIиди ва инсанарин юкIварик паплар кивди. «Гюлбика Уьмаровайин шиърар рягьятди кIваин гъузрудар, гьаддиз бицIидариз ва гьацира аьхюдаризра лап ккунидар ву», – кьимат тувнийи Г. Уьмаровайин яратмишариз Ярмет Ярметовди ва думу чан уьмриъ дуфнайи дережайихъди тебрик гъапIнийи.
Г.Уьмаровайин яратмишарин эгьемиятнакан улхури, гъи гъулариъра модайиъ абхънайи аьгьвалатназ – табасаран хизанариъ бицIидари «дадана» «адаш» гафарин ерина «папа» ва «мама» кIурайивализ шаири чан шиърариинди аьксивал улупурайивал чан улхбаъ шаир Керим Маллаевдира къайд гъапIнийи. (Дупну ккундуки, юбиляри мярака ккебгъайиз сягьнайиина удучIвурайидарикан учв анжагъ бабан чIалниинди тебрик апIуб ккун гъапIнийи, вушра урус чIалназ артухъди майил апIрудар цIиб гъахьундайи).
Сягьнайиина удучIвну узура, шаирари жямяаьтлугъ уьмриъ гъабхурайи важиблу роликан – дурари халкьдин азгар хиялар, кIван гьарай, иццрушин ва дерд ачмиш апIурайиваликан, милли рюгьнан утканвал, абур, уьмрихьна вуйи лигбар атIагурайиваликан – гъапнийза. Дугъриданра, ужур шаир халкьди, чан рюгьнан вари кьувватар уч дапIну, варж йисак сабан арайиз адауру ва дугъ’ин читин ва жавабдарвалин вазифа иливуру – дугъриди, саб жизби кучIалра ктарди, багъри халкьдин рюгьнан утканвал улупуб, аьдати инсанарин гъянаъ айи фикрар, пуз даршулайи хиялар ачухъди, гъавриъ шлуси, тартиб дапIну арайиз адагъуб. Гьаддиз шаир халкьдин мелзра, халкьдин юкIвра ву. Гьаци вуйиган, шаирариз, дурар ихь арайиъ имиди, гьюрмат дапIну ккунду.
Гюлбика Уьмаровайин шиърариз дидикIнайи мяълийир юкIв гъабхруси урхури, мяракайиъ уч духьнайидарин гевюл Марьям Къазиевайи, Гюльнара Агьмедхановайи ва Аьбдуллагь Мирзакеримовди ачухъ гъапIнийи. Гьелбетда, мяълийири ялхъвнарра, ялхъвнари гурлу гарччларра арайиз гъахнийи.
Мяракайиъ иштирак шулайидариз тIагъру хьуз юбиляри чавра гъитрадайи – гагь анжагъ чаз хас вуйи саягъниинди жвуван шиърарин цIарар урхури, гагьсан зарафатар апIури ва уч духьнайидариз учIру, амма хъял дяргъру саягъниинди гьякьар, гагьсан варидариз ужуди таниш духьнайи чан «узуз учву ккундузуз гьа» гафар кIури, тIагърушин саб дакьикьайизкьан залиъ убчIвуз гъитундайи.
Табасаран эстрадайин халис устад Марьям Къазиевайи нубатнан мяъли апIбан кьяляхъ, Гюльбика Уьмарова юбилейихъди тебрик апIури, лихру жвуваз 60 йис лап бицIи вахт ву, хъа фукIа дарапIрайи касдиз кьадарсуз ярхи вахт ву, гъапнийи. Гьаму жигьатнаан шаир Гюльбика Уьмаровайи уьмрин бицIи вахттIан ккадапIнадар. Ляхин апIуз удукьувал, поэзияйихьна айи ккунивал гьисабназ гъадабгъну, якьинди пуз шулу – Г. Уьмаровайи поэзияйи хъана ягъал кIакIар мютIюгъ апIиди.
Макьалайин аьхириъ юбилейин серенжем гьязур апIуз кюмек туву касариз жаради чухсагъул пуз ккундузуз. Хив райондиъ, шаирарин яратмишариз бахш вуйи гьаму жюрейин серенжемариъ иштирак шули сабпи раж дариз. Ва гьарсаб мяракайиъ жанлу иштирак’вал Хив ра-йондин мектебариъ урхурайи бицIидари улупуру – шиърар урхури, авторин уьмрикан ктибтури, мяълийир апIури. Аьламат дарки, мялимарикан тIалаб гъапIиган, дурари бицIидар гьязур гъапIну, пуз мумкин ву узуз сасдари. Дурарра дюз ву, амма саб ляхин кIваълан гъапIну ккундар: бицIидар гьаму жюрейин литературайихъди аьлакьалу мяракйириъ иштирак хьували дурарин гъюзимбу уьмриз аьхю тясир апIуру – гизаф инсанар уч духьнайи залин сягьнайиина удучIвну, утканди шиир урхували дурарин гьевес артухъ апIуру – гъюру ражарира сягьнайиина удучIвуз, багъри чIалниинди эсерар артухъси урхуз, шаирарин уьмрикан цIийи аьгъювалар гъадагъуз ва натижайиъ багъри литературайихьна дурумлу ккунивал яратмиш хьуз гъитру. Гьаддиз Хив райондин мектебариъ табасаран чIал ва литература киврайи мялимариз – Тамила Аьлипашаевайиз, Гюлизар Беговайиз, Мюгьюдин Муртузялиевдиз, Зульфия Шабановайиз, Мейлан Нежефовдиз ва хайлин жарадариз кIваантIан чухсагъул пуз ккундузуз.
Мярака заан дережайиъди гъабхбаъ аьхю зегьмет Хив райондин администрацияйин культурайин, спортдин, жигьиларин политикайин ва туризмдин отделин кIули айи Казбек Къазиевди ва дугъан ярашугъари, хъа гьацира Гьюкуматдин табасаран театрин артистари гъизигнийи. Жвуван культура артмиш апIбак лайикьлу пай киврайи дурариз газат урхурайидарин терефнаан аферин кIураза.
