Газат урхурайи гьюрматлу дуст-кас!

Уву яв хилиъ «Табасарандин нурар» газатдин нубатнан нумра дибиснава. Гъи, декаб-рин 4-пи йигъан, Дагъустан Республикайин гьюкуматдин мялуматарин дакьатари газатарин сабпи маш гьамци чап дапIна. Газатарин сайтариъ, социалин сетарин аккаунтариъра гьамцдар машар рякъюрачвуз. Мялуматарин дакьатарин журналистари РД-йин мялуматарин, аьлакьайин ва махлукьатлу коммуникацйирин министерствойин теклиф кьабул дапIну, сабсан ражари агьалйириз COVID-19 ихь арайиан наанкIа дубшну адруваликан кIваин апIбанди гъахьну.

 

Ухьу женг гъабхурайи тIягъюн лапра чIуруб ву. Гьар йигъан аьзарлу шулайи ва йихурайи инсанарин кьадарну вирусдихъди вуйи женг ккудубкIну адрувал субут апIура. Коронавирус, гизафди вушра, цIибди вушра гьарсарин хизандиз гъафну. Думу уьзрихъ хъугъуз даккнидар кьанди вушра гъагъи аьгьвалатнан гъавриъ духьнашул, дурари гъи чпин жавабдарвал гьисс апIурашул.

 

Ав, йис лап гъагъиб гъабхьну, вари инсанар инжик духьна. Гьаци вушра, ухьу, ихь дагъустанлуйириз хас вуйи сабвал ва сабурлувал улупну, арайиз дуфнайи аьгьвалатнан эйсйир духьну ккунду. КIваинди гъибтурхьа: аьзарлуйирин кьадар цIиб хьувал ватандашарин фагьумлуваликан, ухькан асиллу ву. Анжагъ духтрарин ва Роспотребнадзорин пишекрарин тIалабар тамам апIуритIан, ихь жямяаьтлугъдихьан ва вари дюн’яйихьан му читин аьгьвалатнаан удучIвуз хьибдар.