Коронавирусдиз аькси «Спутник V» вакцинайин кьиматнан гьякьнаан, коронавирус цIийи жюрйириз илтIибкIурайиваликан, уьзур сагъ апIбан бадали, антибиотикдин дармнар ишлетмиш апIбан гьякьнаан, гъийин йигъан коронавирусдихъди аьлакьалуди дюн’яйиъ арайиз дуфнайи аьгьвалатнакан ва жара важиблу хабрарикан жикъиди исихъ туврача.
Урусатдин аьгьвалат
РФ-дин Оперативный штабдин улупбариинди, COVID-19 тIягъюн арайиз гъафихъан мина Урусатдиъ 2,569 миллиондихьна инсанар аьзарлу гъахьну (дурарикан 28 агъзурихьна аьхиримжи йигъанна йишван). Гъийин йигъаз коронавирусдиан ихь уьлкейиъ 45 284 кас гъийихну, тIягъвнин эвелиан мина 10-пи декабриз вуйи улупбариинди, коронавирусдиан аьзарлу гъахьи 2,033 миллион агьалйир сагъ гъахьну.
Дагъустандин улупбар
Роспотребнадзорин Дагъустандиъ айи управлениейин улупбариинди, республикайиъ гъийин йигъаз коронавирусдиан аьзарлу хьпан 20 218 дюшюш гьисабназ гъадагъна. Думу уьзриан 1023 кас кечмиш гъахьну. Гъийин йигъаз 1361 агьали коронавирусдиан аьзарлуди ими. Гьаддихъди сабси, Дагъустандиъ COVID-19 уьзур кубчIву 17 834 кас сагъ гъахьну. Му улупбарихъди Роспотребнадзорин оперативный штабдин онлайн графикариъ таниш хьуз шулу.
COVID-19 фици тарабгъура
Пишекрарин гафариинди, инфекция гьавайикди ва инсандин ширшнакди тарабгъура. Аьзарлу духьнайи касди уьгьйир вая инчйир апIру вахтна утIурчIвру ширшар сагъу инсандик куркIру. Мидланра гъайри, аьзарлу касдилан хабар алдагъруганра уьзур кубчIвбан аьхю хатIа а. Коронавирус хайлин вахтна жюрбежюр шей’ариин, алатариин, палатдиин чIивиди гъубзру. Жямяаьтлугъ йишвариъ, шагьрин транспортдиъ, гизаф инсанар сатIиди уч шлу вари йишвариъ уьзур сар касдикан тмунурикна рягьятди тарабгъуру.
Вакцинайин кьимат
РФ-дин Минздравди коронавирусдин инфекцияйиз аьксиди Гамалейин ччвурнахъ хъайи эпидемиологияйинна микробиологияйин центри арайиз адабгъу «Спутник V» кIуру цIийи вакцинайин кьимат мялум гъапIну. Вакцинайин кьюб доза айи саб медицинайин флакондин кьимат 1942 манат ву. Вакцинайин сабпи руб йивбан кьяляхъ, кюбпиб 3-5 гьяфтайилан дивну ккунду. Кью-кьюб жюрбежюр паярикан дюзмиш вуйи дарман айи хьуб вакцинайин флакондиз 9710 манат кьимат кIура. Урусатдин ватандашариз вакцинацияйин рубар йивиди.
Гьамусяаьт пулсузди вуйи «Спутник V» препарат-дин вакцинацияйин кампания Урусатдин меркездиъ ккебгъна. Сабпидарди вакцинайин рубар медицинайин гъуллугъчйириз, мялимариз, шагьрин жямяаьтлугъ гъурулушдиъ лихурайи вакилариз ва уьзур кубчIвуз хатIа айи жара агьалйириз йивиди.
Ички хай шулдар
Урусатдин Минздравдин штатдин адру кIулин пульмонолог духтир Сергей Авдеевди къайд гъапIганси, коронавирусдин инфекция ктрубчIври кIури, вая профилактикайин жара дюшюшариъ, духтрин ихтияр адарди, антибиотикдин дармнар затра ишлетмиш дапIну ккундар. Вакцинайин руб йивбан кьяляхъ саб гьяфтайиъ бедендиз гуж шлу гъагъи ляхнариинра машгъул хьуз ихтияр адар. РФ-дин вице-премьер Татьяна Голиковайи вакцинайин руб йивнайи йигъари ичкийин сурсатнахьанра ярхлади гъузну ккуниваликан гъапну.
Вари дюн’яйин аьгьвалат
Вари дюн’яйин сагъламвал уьбхбан тешкилатди (ВОЗ) тасдикь апIурайиганси, дюн’яйиъ коронавирусдин инфекцияйиан 65,2 миллион кас аьзарлу гъахьну, дурарикан 1,5 миллион инсанар гъийихну. Хъа Джонс Хопкинсдин Университетдин ачухъ улупбариинди, вари дюн’яйиъ 66 миллионтIан артухъ инсанар аьзарлу гъахьну ва 1,52 миллион кас гъийихну.
Коронавирусдиан аьзарлу хьпан варитIан гизаф дюшюшар США-йиъ тасдикь духьна 14 миллион инсанар. Индия кьюбпи йишв’ин ал – душваъ 9,6 миллион аьзарлу ашкар духьна. Шубубпи йишв’ин – Бразилия (6,5 миллион аьзарлу), юкьубпи йишв’ин – Урусат Федерация (2,5 миллион аьзарлу), хъа хьубпи йишв’ин – Франция (2,32 миллион аьзарлу) ал. Са-саб миллионтIан артухъ аьзарлуйир Испанияйиъ, Великобританияйиъ, Ита-лияйиъ, Аргентинайиъ, Колумбияйиъ, Мексикайиъ, Германияйиъ, Польшайиъ ва Ирандиъ гьисабназ гъадагъна.
Фред Хатчинсондин Онкологияйин ахтармишарин центрин аьлимари (Сиэтл, штат Вашингтон) SARS-CoV-2 вирусдин мутация ахтармиш гъапIну. Му вирусдиз дарман адар. Вари дюн’яйин сагъламвал уьбхбан тешкилатдин хатIалу ва кьатI’и дюшюшарин программйирин директор Майкл Райанди къайд гъапIганси, коронавирусдин инфекцияйиз аькси вакцина-йихьан пандемия анжагъ эпидемиологияйин вари къайдйир уьрхюри гъахьиштIан дебккуз хьибдар.
Китайин ригъ алабхъру кьибла терефнаъ чаппархларик коронавирусдин цIийи жюрйир ашкар духьна. Дурарра инсанарикна тарагърудар вуйиб тасдикь гъапIну.
