Гъябгъюрайи йисан мартдин вазлиъ думуган РД-йин кIулиъ айи Владимир Васильевди Дагъустандин культурайин цирклиъ баркаллуди зегьмет зигурайи саб жерге гъуллугъчйир республикайин заан пешкешарихъди ва ччвурар тувбахъди лишанлу гъапIнийи. Дурарин арайиъ ихь халкьдин машгьур артист Гюльназ Гьяжикъурбановара айи – дугъаз «Дагъустан Республикайин лайикьлу артист» ччвур тувнийи. Учу думуган Гюльназ му заан ччвур тувбахъди газатдин терефнаан тебрик гъапIнийча, амма коронавирусдин тягъвнихъди аьлакьалу вуди дугъахъди гюрюшмиш хьуз мумкинвал гъабхьундайчуз.
Улихьна йигъари Гюль-наз Гьяжикъурбанова «Таба-сарандин нурар» газатдин редакцияйиз гъафну ва учу думу хъуркьувалихъди багахьди тебрик гъапIнийча. Учухъди вуйи сюгьбатнаъ Гюльназди чан уьмрикан, сумчрарин дюшюшарикан, гьязур апIурайи цIийи клипарикан, артиствалин рякъюъ чаз кюмекчйир гъахьи инсанарикан ва гележегдин планарикан ктибтнийи.
Гюльназ Гьяжикъурбанова Табасаран райондин ЦIа-нитIил гъулаъ бабкан гъахьну. Мяълийир апIбахъ думу гьеле бицIидимиди юкIв хъайир вуйи. Амма думу вахтна абйир-бабари жигьил шубар мяълийир апIуз гьеле-меле гьаъри шулдайи. Ва Гюльназдизра адашди сифте ихтияр туври гъахьундар. Москвайиз медицинайин училищейик урхуз кучIвуз душну, имтигьнар тувну гъюбан кьяляхъ, адашди, аьхирки, Гюльназдиз, гъардшарихъди сатIиди гъягъюри, сумчрариъ ва концертариъ мяълийир апIуз чан разивал мялум гъапIнийи. Дугъан уьмрин улихь кьюб рякъ дийигъну – сягьна вая медицина. Гюльназди артиствалин рякъ ктабгъуру.
«Учуз теклиф гъапIу сабпи сумчир гъиси кIваин илмийиз. Узуна йиз гъардшар Мурад ва Рамис ЦIурутIил гъулаз сар балин сумчриз гъушнийча. Улихьна йисари сумчрар асас вуди чвлин вазариъ гъахуйи. Ихь вари жара музыкантар жюрбежюр сумчрариъ айивализ лигну, чпиз музыкантар дидрихъган, сумчрин эйсйири учуз теклиф гъапIнийи. Пуз ккундузузки, йиз гъардшари думу вахтари музыкайин алатариин мукьмар йивуз бегьемди дудубгънайи. Мурад узутIан шубуд йисан, хъа Рамис – 4 йисан бицIидар ву. Учу сумчир айи хуларин ракк-нарихъна гъафиган, эйсйири ва уч духьнайи инсанари учхьан, хъа музыкантар наши, кIури гьерхнийи. Думу сумчир учуз ягъурлуб гъабхьну. Учура думу кIваантIан ужуди кIули гъубхнийча. Дидхъан мина ЦIурутIил гъул’ан ва ихь Табасарандин саки вари гъулариан учуз сумчрариз теклифар гъюра. Мидланра гъайри, цIахур, лезги, агъул, рутул, азербайжан ва жара миллетарин вакиларира чпин сумчрариз учуз дих апIура. Жара халкьарин чIалар аьгъдрувал артистдиз читин месэла дар. Артистдиз варитIан важиблуб – учв тамашичйири фици кьабул апIураш, гьадму ву», – ктибтура Гюльназди.
Дугъу, чаз мяълийир гъидикIу ва дикIурайи табасаран шаирар Эльмира Аьшурбеговайиз, Гюлбика Уьмаровайиз, шаир, табасаран драмтеатрин директор Аьлимурад Аьлимурадовдиз, рутул халкьдин шаир Оксана Султановайиз ва жарадариз чухсагъул мялум апIури, му касари чан яратмиш’валин рякъюъ важиблу роль уйнамиш гъапIуваликан ва апIурайиваликан гъапну. Мукьмар дугъаз асас вуди Надирбег Къазиевди ва дагъустандин мукьмар, жюрбежюр гьенгар арайиз хурайи аранжировщикари гьязур апIура.
«Йиз сабпи мяълийир арайиз гъахир, клипар гьязур апIуз кюмек гъапIур, жикъиди кIуруси гъабхьиш, узу артистси арайиз адагъур табасаран драмтеатрин директор Аьлимурад Аьлимурадов ву. Йиз «Гъач, риш, гъач» кIуру сабпи мяълийин гафар мектебдиъ ич классдин руководители гъидикIдар ву. Думу мяъли апIури, сабпи ражари эбелцнан машквриз тялукь концертдиъ иштирак гъахьнийза. Думу вахтна йиз кIваъ ади гъахьи шадвалин хиялар, узу РД-йин лайикьлу артистар Марьям Къазиевайихъди, Аьбдуллагь Мирзакеримовдихъди саб сягьнайиин аливалин разишнан гьиссар, хайлин йисар гъушнушра, сабдихьдира тевуз шулдарзухьан. Гьаддиз тазади артист хьуз ккунидариз, сабдихьанра гучI дарапIди, кIваъ айи хияларихьна гъягъювалин теклиф апIураза», – гъапнийи Гюльназди.
Гюльназ Гьяжикъурбано-вайи чан гъардшарихъди гележегдиъ харижи уьлкйириъ ва Кафари Кавказдин регионариъ цIийи клипар адагъуз гьязур шула. Мидланра гъайри, цIийи йисандин улихь дурарин дестейи Дагъустандин ва Урусатдин жюрбежюр шагьрариъ концертарин программйирра гъахиди.
Ич гюрюш редакцияйиъ инстаграмдин прямой эфирианра улупнийча. Думуган, Гюльназ Гьяжикъурбановайиз «РД-йин лайикьлу артист» ччвур дюз дарди тувна, кIурударра хайлин гъахьнийи. Гьацдар инсанарин фикрарра гьисабназ гъадагъну, учу сюгьбатнан кьяляхъ хайлин йисари Гюльназдин продюссерди гъахьи, дугъан документар гьюкуматдин заан ччвур тувбахьна улупу ва гьамусяаьт Гьюкуматдин табасаран драмайин театрин директорди лихурайи Аьлимурад Аьлимурадовдихьна илтIи-кIунча.
«Дагъустан Республикайин лайикьлу артист» ччвур Гюльназ Гьяжикъурбановайи фици гъазанмиш гъапIну кIури, гьерхрайи касариз пуз ккундузуз. Му сад йигъандин вая сад-кьюд йисандин ляхин дар. Му йигъахъна Гюльназ 15 йисан гъюри гъахьну. Гюльназ гьар йисан Дагъустан Республикайиъ гъягъру гьарсаб серенжемдиъ, гьарсаб машквриъ, табасаран халкьдин культура уьбхюри, йисандин фунуб вушра вахтна иштирак шули гъахьну. Мягьячгъала шагьрин асас майдандин багахь, чпи гъахи маршруткайиъ чан никкдихъ хъайи бицIир гъитри, гьюкуматди тешкил апIру концертарин репетицйириз гъягъюри, гьадушваъ саб бицIиди азад вахт ккабхъубси, машиндиъ айи веледдихьна жаргъури гъахьну. Дугъаз бицIидар гъитру йишвкьан адайи. Амма, сабдизра дилигди, дугъу ихь республикайин, багъри Табасарандин тереф, культура аьхю мажлисариъ заан дережайиъди улупуз мумкинвал абгури гъабхьну. Мисалназ, Москвайиъ Дагъустандин йигъар къайд апIурайи серенжемариъ Кремлин дараматдиъ дугъу фольклорин блокдиъ табасаран халачйирикан гъапIу мяъли вари залиъ айидариз кьабул гъабхьнийи. Гьаци дугъу харижи уьлкйириъра табасаран культурайин тереф уьбхюра. Гъи гизафдари, Гюльназди, сумчрариз гъягъюри, чаз лайикьлу ччвур гъазанмиш дапIна, кIура. Ваъ, дар. Сумчрариз гъягъюра кIури, Правительствойиан дицисдар ччвурар тувруб дар. Думу ччвур тувайиз, инсанди гъабхурайи ляхин му ччвурназ лайикь вуш вая дарш, ахтармиш апIура. Гюльназ Гьяжикъурбановайиз думу ччвур лайикьлуди тувнайиб ву», – гъапну Аьлимурад Аьлимурадовди.
