Гъи, заан технологйирин аьсриъ, дагълу республикайиъ дуланмиш шулайи инсанар штухъ мюгьтаж духьнайивал узуз гьаз-вуш аьламатнан ляхинси рябкъюразуз. Штун месэла ихь республикайин саки вари муниципалитетариъ гъагъиди ди-йибгъна. Гъулариъ штун латар ерццура кIури, гьар йигъан ебхьури шулу. Хъа ухьу гъуларикан ваъ, шагьрикан улхидихьа.

 

Ноябрин вазлин 15-диан республикайиъ, зат яваш даршули, саки 2 гьяфтайин арайиъ мархь убгъури ими. Гьадму йигъари Мягьячгъалайиъ, Дербентдиъ хулариъ шид убчIвну, зарар гъабхьи касарра а, гьятта швнуб аьсрариинди дийибгънайи Нарын гъалайин цалра, мархьарин шид гизаф дубхьну, кучвубхну гьадабхъну. Мархьар яваш дарди ургъурайивалиан Каспийск шагьриз гъюрайи убхъру шид зат ишлетмиш апIуз даршлуганси кьалу гъабхьну. Магьа саб ваз дубшна, хъа шагьрин агьалйириз гьелелиг марцци шид дуфнадар.

Каспийск шагьриъ штухъди аьлакьалу аьгьвалат лап читинди вуйивализ лигну, инсанар штухъ мюгьтаж духьнайивал, гьятта магазнариъ бутулкйириъдикьан шид адрувал гъябкъиган, шагьрин жямяаьтлугъ касари гьяракатниинди гъагъи месэла гьял апIуз хъюгъну. Сарпирди инсанариз кюмек апIуз удучIвур Дагъустан Республикайин боксдин федерацияйин кIулиъ айирин заместитель Достяли Гьейбатов ву. Учв яшамиш шулайи шагьрин аьгьвалат лап читин гьялнаъ айивализ лигну, дугъу, чаз гьай кIурадариз варидариз дих дапIну, шагьриз аьхю цистернйириинди марцци шид хувал тешкил гъапIну.

«Каспийск шагьур йиз багъри шагьур вуйиз. Мушваъ айи гьарсаб читин месэла фициб вуш, инсанар фици яшамиш шулаш, узуз аьгъязуз. Штухъди аьлакьалуди му ражарисиб аьгьвалат шагьриъ зат гъабхьиб дар. Инсанар читин гьялнаъ айиваликан хабар гъабхьибси, узуна «Каспийск ич шагьур» кIуру жямяаьтлугъ тешкилатдин кIулиъ айи Светлана Багмет улихь гьучIвну, сатIиди сифте ич дакьатарихъ, хъасин кюмекнан хил гьачIабкку хайлин жара касарин дакьатарихъ, шагьрин гьарсаб терефназди шид айи цистерна гъюру вахт улупну, тоннариинди шид хуз хъю-гъюнча. Гьаму жюрейиинди 25 йигъан ляхин кIули гъубхунча. Гьаму йигъарин арайиъ спонсорарин кюмекниинди уч дапIнайи 1 миллион манатдин дакьатарихъ вари шагьур штухъди тямин гъапIунча. Шагьрин гьарсар агьалийихьан шид адрувалин гьякьнаан аьрзйир кьабул апIури, гьяракатниинди ляхин гъабхури гъахьунча, фицики аьзарлу касар, кьабидар, бицIидар хулаъ адру гьич саб хизанкьан адар. Учухъди сабси, аьзарлу, яшлу касарин хулариз шид гъабхури, хайлин волонтерарира ляхин гъапIну.

Гьацира шагьрин депутатарин собраниейин депутат Шамиль Багомаевди чан терефнаан 1500-тIан артухъ шид айи бутулкйирихъди инвалидар тямин гъапIну. Мидланра гъайри, «Инсан» кIуру рягьимлувалин фондну шагьрин агьалйириз шид гъабхну, хъа Абусуфьян Акаевдин ччвурнахъ хъайи фонднан кюмек вуди Буйнагъск райондин Заан ва Асккан Казанище гъулариан штухъди ацIнайи 25 машинар Каспийскдиз гьаъну.

Гьаму йигъарин арайиъ йишв-йигъ дарпиди шагьрин агьалйир штухъди тямин апIуз зегьмет гъизигу касар Нелли, Файзат ва Нина Мягьямедовар, Мурад Сатуев, Мая Аьбдулжелилова ву.

Дарпиди гъибтуз шулдар, шагьрин мялим Аминат Кьадиевайи гьар йигъан дарсарин кьяляхъ 30 хизан штухъди тямин апIуз чан дакьатарихъ кюмек гъапIну. Хъа «Арадеш» алверчивалин хулан директор Каймурзайи шагьриз шид гъабхи машинарихъ хъайидариз варидариз чан хусуси столоваяйиъ чIанади ипIруб гъивну», – кIура Достяли Гьейбатовди.

Ич сюгьбатнан аьхириъ Достяли Гьейбатовди чахъди сабси ляхин гъапIу касариз варидариз чухсагъул мялум гъапIну. Фицики, 25 йигъандин арайиъ 120 агъзур кас яшамиш шулайи аьхю шагьур штухъди тямин апIувал рягьят ляхин дар.

Хъа шагьриъ гьамусяаьт туврайи штун гьялнакан улхуруш, думу гъаб-гъажагъ жибкIузкьан ишлетми апIуз шулдар, гьамусра душваъ штухъди вуйи аьгьвалат гъагъиди гъубзра. Шагьрин «Водоканал» МУП-ди, гьаму йигъари варидарин хулариз марцци шид гъибди кIури, гаф тувна, амма, гьелелиг, шид марцц дубхьнадар.

Багарихьди шагьриъ марцци шид шул кIури, умуд кивраза.