РД-йин МВД-йин пресс-гъуллугънаан мялум гъапIганси, декабрин 14-пи йигъан Хасавюрт шагьриъ полицияйин вакилари «Алкоголь – Тембеку» операция кIули гъабхурайи вахтна сар дишагьлийин хулаъ 350 килограмм зигуз ихтияр адру тембекуйин «насвай» кIуру сурсат гъибихъну.

 

Къанун уьбхру органарин вакилариз думу дишагьлийи чан хул’ан насвай масу туврайиваликан мялумат гъафнийи.
Полицияйин вакилари дишагьлийин хулаъ ва гьяятдиъ ахтармиш’валинна агбан серенжемар гъахбан натижайиъ тембекуйин насвай сурсат айи 11 шишал гъидихъну. Дурар дишагьлийи багарихьди масу тувуз гьязур дапIнайи.

«Му дюшюш ахтармиш апIувал себеб вуди, дишагьли полицияйин отделиз гъахну, ва наркотикдин сурсат кайи тембеку айи шишларра тадагъну. Дишагьлийин гафариинди, му жюрейин тембеку дугъу 2010-пи йисхъан мина масу тувра. Дугъу думу гъунши региондин сар жвувхьан масу гъадабгъура. Наркотикдин сурсат кайи тембеку дишагьлийи, шюшдин банкйириъ абхьну, багарихь ерлешмиш духьнайи туканариъ ва базариъ алвер апIурайи касариз масу тувради гъахьну», – хабар тувра республикайин МВД-йиан.

Силисар гъахувал давам шули ими. Силисчйири му тахсиркарвалин дюшюшдин жара иштиракчйир фужар вуш, ахтармиш апIура.