Табасаран райондин аьхю советарикан саб вуйи Халагъ гъулан совет заан Табасарандиъ, Кьаркьул дагъдихьна багахь сивариккнаси ерлешмиш дубхьна, ва диди Хив райондин сяргьятарихъди гъуншивал апIура. Му советдин дахилнаъ шубуб гъул а: Халагъ, Бухьнагъ, Жвулли, хъа душваъ яшамиш шулайи агьалйирин уьмуми кьадар 1660 кас ву.
Замир Агъабегов 1965-пи йисан 15-пи июндиъ Табасаран райондин Жвулли гъулаъ бабкан гъахьну. Сифте Жвул’арин гъулаъ 8-пи класс, хъасин Халгъарин кьялан мектеб ккудукIну, дугъу 1982-1985-пи йисари Новочеркаскдиъ Политехнический институтдиъ энергетикайин факультетдиъ урхури гъахьну. Армияйин жерг-йириъ эскервалин буржи тамма апIбан кьяляхъ, думу багъри гъулаз гъафну, ва 1988-1998-пи йисари Жвулли гъулаъ магазиндин заведующийди, хъа 1998-2003-пи йисари Жвул’арин 4-пи нумрайин халачйирин цехдин заведующийди лихури гъахьну. 2003-2015-пи йисари хусуси дилаварчивалиин машгъул гъахьну. 2006-2012-пи йисари Мягьячгъала шагьриъ финансаринна ихтиярарин институтдин юриспруденцияйин факультетдиъ гъурхну. 2015-пи йисхъан мина Халагъ советдин главади лихура. Замир эвленмиш духьна, дугъу шубур бицIир тербияламиш апIура.
Халагъ гъулан советдин аьтрафар 989 гектар жилиин гьатIарццна, дурарикан 576 гектар гъулан мяишатдин, 48 гектар изан апIру хутIлар ву.
Гъулан советдин улихь дийигънайи вазифйирикан ич мухбир Ражаб Нуровди Халагъ гъулан советдин администрацияйин глава Замир Агъабеговдихъди сюгьбат гъубхну. Думу жикъиди исихъ чап апIурача.
– Замир ТIагьирович, гьамусяаьт дагълу гъулариз гъягъюрайи рякъяр рас апIбаз аьхю фикир тувуз хъюгъна. Халагъ советдин терефназди гъюрайи рякъяр рас апIбакан фу пуз шулвухьан?
– Гьамусяаьт Хючнаан Халагъна гъябгъюрайи рякъхъан Афна гъулазди 800 метр рякъ дапIну ккудубкIну. Дидкан, Гуми советдин аьтрафарилан мина гъябгъюрайиб вушра, кьюбби советарира мянфяаьт ктабгъура. ЦIийи рякъ, уз машар адарди кибицури, кьюрдун вахтна машинар ккудучIвуз рягьятуб гъабхьну. Рякъ тикмиш апIуз кюмек апIбаз ич советдин ва халкьдин терефнаан Жвулли гъул’ан вуйи меценат Межлум Гьяжимягьямедовдиз ва Табасаран райондин главайиз чухсагъул пуз ккундучуз.
2020-пи йисан Халагъ гъулан советдин регьберваликкди, Жвулли, Афна, Гуми, Бухьнагъ ва Халагъ хайлин агьалйирихъди гаф-чIал дапIну, Угъулдиан зина уз машар адруганси яркврар утIурчури, кудухнайи гъулариз рякъ гизаф багахь шлуганси, Хючна–Халагъ рякъ апIуз хъюгъна. Думу рякъюз- ра Жвулли гъулан агьали Межлум Гьяжимягьямедовди кюмек апIуз гаф тувна. Му касдиз хъанара аьхю чухсагъул мялум апIуз ккундучуз.
– Гъулар штухъди тямин апIбан гьякьнаан фицдар планар йитIурачва?
– Рубас нирин сивариан ккебгъру йишвхьан Халагъ гъулазкьан, Гуми советдин гъуларра кахьруганси, дурар штухъди тямин апIбан гьякьнаан проектдин сметайин документар гьязур дапIна. Гьамусяаьт проект тасдикь дапIну, кьяляхъ хътапIайиз ккилигурача.
– Гъуларин жигьилариз азад вахт мянфяаьтлуди адапIуз фицдар шартIар яратмиш дапIначва?
– Халагъ гъулан советдиз дахил шулайи вари гъулариъ «БицIи бюджетдин спортдин майднар» тикмиш апIуз проектар гьязурди а, тялукь жиларра жара дапIнача. Гьацира бицIидариз тамшир апIру майднарин проектарра а. Гъулариъ айи инсанарин яшайиш ужу апIбан, гъуларин булагъар ккабалгбан, мархьар-селлер гъургъиган, шид ахмиш шлу йишвар тикмиш апIбан бадали, 2020-2025-пи йисариз вуйи планарра гьязур дапIнача.
Учу жюрбежюр йишварихь хьайи, ишлетмиш’валин вахт ккудубкIу гакIвлин бурузарра цIийидарихъди гьюдюхнача.
– Халагъ гъулан советдин агьалйирин игьтияжар гьуркIру жямяаьтлугъ идар-йирин гьял фициб ву?
– Халагъ гъулан советдин аьтрафариин 2 кьялан мектеб (Жвуллиъ), 1 бицIидарин багъ (Халагъ), 1 духтирвалин амбулатория (Бухьнагъ), 1 ФАП (Жвуллиъ), культурайин 2 хал (Жвуллиъ ва Халагъ), 2 библиотека (Жвуллиъ ва Халагъ) ал. 2020-пи йисан федералин бюджетдин дакъатарихъ Жвулли гъулаъ цIийи ФАП тикмиш гъапIну. Советдин терефнаан ФАП тикмиш апIуз жил гьадабтIну.
Жвулли гъулаъ айи культурайин хал «Ерли жягьтлувалар» кIуру проектдиинди капитально рас апIбан бадали, проектдин сметайин документарра гьязур дапIнача, жавабназ ккилигурача.
– Гьял дарапIу фицдар месэлйир улихь дийигъну имийичв?
– Гьял дарапIу месэлйир гизаф гъузра. ВаритIан учIруди дийибгънайиб ва гьарган уликк ккайиб зирзибилин месэла ву.
Гьамус Жвулли гъулаъ ерлешмиш духьнайи, федералин мяна айи архитектурайин мист ва минара ЮНЕСКО-йин программайиинди рас апIбан проектдик кирчайиз ккилигурача.
Пулин дакьатарин гьякьнаан гизаф читинвалар алахьура. Советдин бюджет лап бицIиб ву, гьаци вушра жюрбежюр проектариъ ва программйириъ иштирак хьуз чалишмиш шулача.
