Гьар йисан декабрин 15-пи йигъан Урусатдиъ чпин пишекарвалин вазиф-йир тамам апIурайи вахтна йивну гъийиху журналистар кIваин апIру йигъ къайд апIури шулу. Думу йигъан уьлкейин вари регионариъ дицдар журналис-тар кIваин апIбан серенжемар гъахуру. Журналиствалин пише ктабгъу думу дирбаш касари, ухьуз варидариз гьякь ва нягьякь улупбан бадали, чпин уьмрар тувну. Дурарихьанра ккебехъну дийигъуз, гъалмагъларин гъизгъинвал айи йишвариз дурушди гъузуз шуйи, амма дурари чпин гъянаъ айи жавабдарвалин буржи тамам апIури гъахьну.
Вари халкьарин махлукьатлу дакьатарин институтдин улупбариинди, 2012-пи йисан дюн’яйиъ 119 журналист йивну гъийихну, жара йисаритIан му улупуб лапра гизаф ву. 2020-пи йисан эвелиан мина СМИ-йин 32 пишекар йивну гъаийихну. Гьаддиз, гъи-йихдарин кьадар гьисаб апIуруш, ислягь пишйирин вакиларикан шахтерар сабпи йишв’ин ал, хъа журналистар – кьюбпи йишв’ин.
Урусатдиъ гьар йисан жюрбежюр дюшюшариъ 10-рилан 20 касдиина репортерар йихура. 1993-пи йислан 2018-пи йис’азкьан СМИ-йин 347 пишекрар гъийихну.
Дагъустандин йивну гъийиху журналистрин сиягьра жикъиб дар: республикайин милли политикайин министр Загьир Арухов, «Сабпи каналин» корреспондент Ильяс Шурпаев, «Дагъустан» ГТРК-йин дагъустандин бюройин директор Гьяжи Абашилов, «Гьякьикьат» газатдин кIулин редакторин заместитель Малик Агьмедилов, Дагъустандин Президентдин мялуматарин политикайин ва пресс-гъуллугънан управлениейин начальник Гьарун Къурбанов, «Черновик» газатдин директор Гьяжимурад Камалов, «Новое дело» газатдин журналист Аьгьмеднаби Агьмеднабиев ва хъана гьацдар жарадар.
2013-пи йисан Мягьячгъалайиъ республикайин чапханайин дараматдин улихь чпин пишекарвалин буржи тамам апIури гъийиху журналистариз бахш дапIнайи ядигар дивру йишв’ин сабпи гъван дивнийи. Дидхъан мина гизаф йисар душна, амма гъвандикан ядигар гъабхьундар.
Хъа журналистар гьарганси гьамусра, коронавирусдихъди аьлакьалу гъагъи женгнаъ гьякь ва нягьякь абгури, чпин пишекарвалин вазифйир тамам апIури, ляхнихъ хъа. Гьелбетда, гьарсаб ляхниъ чан читинвалар ва рягьятвалар а. Аммаки, гьякьна нягьякь абгувал, думу инсанарин арайиз адабгъувал ва дидихъ хъугъуз гъитувал лапра читин ляхин ву.
