Мялум вуйиганси, ихь дуланажагъдиъ ЖКХ-йин циркил гъийин девриъ вартIан читинубси гьисаб апIура. Гъулариъ ляхин адрувализ лигну, гизаф жигьилар ихь республикайин гъулариан шагьрариз кючмиш шула, ва кьадарсузди тикмиш апIурайи гизаф мертебйирин хуларира му цирклиин аьхю гъагъ илипура. Дербент шагьриъ му цирклин месэлйирикан узу шагьрин УЖКХ-йин начальник Артур Гьямзатовдихъди сюгьбат гъубхунза.
Артур Гьямзатов ноябрин 13-пи йигълан мина Дербент шагьриъ лихуз хъюгъну. Улихьна дугъу Москвайиъна Мягьячгъалайиъ му цирклиъ ляхин апIури гъахьну. «Йис аьхирихъна гъюрайи вахтна му ляхнихъ хъюгъювал думукьан рягьятди алабхъундарзуз. Дербентдиъ айи канализацияйин ва манишин тувру гъурулушар вари йирси духьна. Дурар вари бегьемди дигиш дапIну ккунду. Гьацира учу гизаф фикир шагьрин паркар ва вари кючйир мучIу вахтна аквнахьди тямин апIбазра туврача. Мартдин аьхириз му ляхнар ккудукIувал пландик кайич. Гележегдиъ, му ляхнихъди аьлакьалу вари лазим вуйиб масу гъадабгъну, герек гъабхьибси, думу ишлетмиш апIуз шлубсиб къайдайиинди ляхин гъабхувал планламиш апIурача. Мягьячгъала шагьриъра гьациб къайдайиинди ляхин кIули гъабхура», – кIура Артур Гьямзатовди.
Дугъу мялум гъапIганси, гизаф мархьар ургъру вахтна, 345-пи Стрелковая дивизия кючейин 11-пи нумрайин гизаф мертебайин хуларин подвалариъси, 1-пи этаждиъ айи квартирйириъра шид убчIвуйи. Улихьнаси думу кючейин кьюбби терефарихъанра аьхю селлер гъургъган шид гъябгъру гъурулушар тикмиш гъапIну, ва гизаф йисариинди учIруди дийибгънайи месэла гьял гъапIну.
«Ич ляхниъ читинвалар гизаф алахьуру. Дурар гьял апIбан бадали, шагьрин глава Хизри Мягьямедовичдихъди сатIиди ич ляхин планламиш апIурача. Думу варибдин гъавриъ айир, агьал-йирин тIалабар гьуркIуз чалишмиш шулайир ву. Гьацира, рякъяр рас апIбан ляхинра улихь гъябгъбан бадали, авар-йирин гъуллугъ тешкил апIуз ва дина 5-6 пишекар гъадагъуз ккача»,
– давам гъапIну Артур Гьямзатовди.
Тешкилатдиъ саб вуйи диспетчервалин гъуллугъра абццуз ккунди а. Дина илтIикIу агьалйирин тIалабар гьуркIбан бадали, му гъуллугъну шагьриъ айи 28 ТСЖ-йин руководителарин, зирзибил уч апIру региондин операторин, агьалйир штухъди тямин апIру МУП «Дербент 2.0» тешкилатдин ляхниин гюзчивал гъабхиди.
Мидланра гъайри, шагьрин артмиш`вализ фикир туври, Набережная кIуру кюче яркьу апIуз, спортдинна юкIв алдапIбан комплекс тикмиш апIуз, шагьрин кьибла терефнаъ «ЦIийи шагьур» дивуз планламиш дапIна.
«Дербент шагьур къайдайиз хпан бадали, гизаф мертебайин хуларихъ къанунсузди дивнайи вари тикилишар гьадагъуз, бицIидарин майднар тешкил апIуз, айидар къайдайиз хуз ккача. Приморская кючейин 8-пи нумрайин хулан аьтрафар къайдайиз гъахунча. Йиз фикриан, агьалйир гъавриъ хьиди. Къанунариинди яшамиш шули, гьяятар, кючйир къайдайиз гъахиш, варидариз кьабул хьибди. 2021-пи йисаз, гьюл марцциди уьбхбан бадали, канализацияйин дараматарра дивувал планламиш дапIна. Дурар, цIиб ухдира ккудукIуз мумкин ву»,
– аьлава гъапIну Артур Гьямзатовди.
Ав, аьхиримжи вахтна, шагьриъ ужудар дигиш`валар хьуз гъитувал себеб вуди, шагьрин глава Хизри Абакаровдира му тешкилатдин пишекрариз удукьру кюмек апIура. Артур Гьямзатовди, шагьрин агьалйирин тIалабар гьуркIбан ва му цирклиъ ужудар натижйир хьпан бадали, чпин тешкилатдин пишекрар зегьмет зигуз гьязур вуйивал тасдикь гъапIну.
