«Табасарандин нурар» газатдин редакцияйи мартдин вазлин эвелиъ, бабарин Йигъаз бахш вуди, республикайин мектебариъ урхурайи табасаран баяр-шубарин арайиъ «Йиз дада дюн’яйиъ варитIан ужур ву» темайиан мектебдин сочиненйирин конкурс тешкил гъапIнийи.

 

Конкурсдиз 50-тIан артухъ сочиненйир хътIаъну. Мартдин 28-пи йигъан газатдин редакцияйиъ конкурс-дин натижйир гъивну. Конкурсдин жюрийиъ шаир Эльмира Аьшурбегова, табасаран чIал кивру мялим Гюльмира Мамедова, «Табасарандин нурар» газатдин журналистар Зубайдат Шябанова ва Гюльнара Мягьямедова айи. Натижйир йивруган, дидин иштиракчйир 3 дестейиз пай гъапIнийи: бицIидарин, кьялан ва аьхюдарин.

БицIидарин дестейиъ 1-пи йишв Суна Сяидовайи (Халагъ, 4-пи класс), 2-пи йишв – Ханума Ягь’яевайи (Каспийск, 9-пи СОШ, 3-пи класс), 3-пи йишв – ФатIима Шябановайи (Каспийск, 6-пи СОШ, 2-пи класс) ва Сабина Эскеровайи (ТIюрягъ, 2-пи класс) гъадагъну.

Кьялан дестейиъ 1-пи йишв Эльнара МутIалимовайин (Халагъ, 7-пи класс), 2-пи йишв – Амина Аьбдуллаевайин (ГьепIил, 8-пи класс), хъа 3-пи йишв – ФатIима Аьгьмедовайин (Хив, 6-пи класс) сочиненйири гъидисну.

Аьхюдарин дестейиъ 1-пи йишваз Мягьяммадяли Сеидовдин (Халагъ, 11-пи класс), 2-пи йишваз Мягьрам Эскеровдин (Халагъ, 9-пи класс) ва 3-пи йшиваз Малика Нежефовайин (Мажвгул, 10-пи класс), сочиненйир лайикьлу гъахьну.

Конкурсдин вари гъалибчйириз багарихьди «Табасарандин нурар» газатдин редакцияйиз пешкешар багъиш апIбан серенжемдиз теклиф апIидича.