Гъулариъси дарди, гизаф машинар айи шагьрариъ, инсандин сагъламвализ чIуру тясир дарапIбан бадали, артухъдиси жюрбежюр гьарар, рукар-кюлер ва кюкйир кивну ккунду. БицIи классариъ урхурайи баяр-шубаризра кмиди дурари гьава марцц апIурайиваликан аьгъя.
Гьаму кьаназкьан шагьрарин, районарин кючйирикан, паркарикан фикир ктруси яшамиш шулайи ихь дагълуйири гьамус, нивкI’ан хъергдариси, гьарар, рукар-кюлер, кюкйир кивуз хъюгъна.
Хьадан вахтна манишну уржури шлу Дербент шагьрин паркариъ ва кючйириъ думу ляхин фици кIули гъабхураш ахтармиш апIуз кIури, узу мушваъ ццийин йисан январин 9-пи йигъхъан мина цIийикIултIан тешкил дапIнайи МБУ «Горзеленхоз» тешкилатдин директор Сергей Алахкъулиевдихъди гюрюшмиш гъахьунза.
Сергей Сефибеговичди гъапиганси, шагьриъ улихьдира мициб тешкилат ади гъабхьну, хъа 2014-пи йисан думу хъябкьнийи. Цци цIийиди ляхник кипнайи тешкилатдиъ гьамусяаьт 55 пишекар лихура. Шагьрин тIалабар гьуркIбан бадали, тешкилатдиз 5-6 – сана пишекрар лазим ву. Гьелелиг ляхниз гъюрудар адар.
«Шагьриъ, Набережнаяра кади, 6 парк а. Ич вазифйир – вари паркариъ, кючйириъ ва гьацира гьарар, рукар-кюлер, кюкйир кивну ккуни йишвариъ дурар кивувал, дурарин гъайгъу зигувал, шид хъубзувал, удубчIвру укI убшвувал вуйич. Гьацира ич пишекрари чпин кьяляхъди гъубзу укI, кюлер, чIюрхяр гьадагъура ва шагьрин паркариъ рягьятвал йивуз ккунидариз шартIар яратмиш апIура. Вари паркариъ укI дубшвну ккудубкIайиз, думу хъана убшвру вахт хъубкьру. Кивнайибдихъ шид хъубзбан, гъайгъу зигбан бадали, лазим вуйи алатар, шлангар, чIюрхяр ахьру гъабар, шид хру машинар – вари масу гъадагъну, гьязур апIуз ккача»,
– кIура Сергей Сефибеговичди.
Дугъу къайд гъапIганси, гьар паркдин гьякьнаан жавабдарвал гъабхурайи пишекрар а. Дурар, жара тешкилатарин пишекрарси, гьар йигъан гвачIниан хябяхъдизкьан ляхниъ шулу.
«Низамийин ччвурнахъ хъайи паркдин проектдинна сметайин документар гьязур гъахьибси, думу паркра къайдайиз хуз гьязурди вуча. Гъира 20 мюрхюн гьарарна хярдин гьарар кивунча. Вари паркариъна кючйириъ му жюрейин 300 гьар кивнача. Гьацира 500 акацияйин, 440 самшитдин гьарар, 400 гъизилгюлин кюкйир кивунча. Багарихьди олеандр кIуру, гьарган чруди гъубзру рукарра кивдича. Гьацира наратдин, мукIрукIин, шабалутдин, вершун гьарар кивуз планламиш дапIнача», – давам гъапIну йиз сюгьбатчийи. Дугъу гъаписи, му тешкилатдин метлеб – шагьур гьарарихьдина кюкйирихьди балгувал ву. Улихьна йисари гьарар кивну ккудубкIбалан кьяляхъ, дурар кIваин дарапIри гъахьнуш, му тешкилатдин кIулиъ айирин гафариинди, думу вахтар тарихдиз гъушну.
«Ич пишекрариз рягьятвал гъадабгъру кьюд йигъра а. Дурарин маважиб 14-15 агъзур манат ву. Пулин дакьатар вахтниинди ва вазлин арайиъ кьюб ражари тувра. Узу му шагьриъ бабкан гъахьир вуза, мушваъ яшамиш шулаза. Шагьур ужуб терефназди дигиш хьпан бадали, узуз айи аьгъювалар ва кьувват гьяйиф апIидарза»,
– гъапну ич сюгьбатнан аьхириъ Сергей Алахкъулиевди.
Гьамусяаьт му тешкилат Набережная пляждихъ хъайи дараматариъ а. Мартдин 26-пи йигъан шагьрин глава Хизри Абакаровдин тешкиллувалиинди му пляж зирзибилихьан марцц апIру ва гьарар кивру акция кIули гъубшну. Думу акцияйиъ Хизри Мягьямедович, ДДЮТ-дин мялимар ва шагьрин мектебариъ урхурайи баяр-шубарикан тешкил дапIнайи главайин кюмекчйирин десте, администрацияйин пишекрар иштирак гъахьну.
«Учуз му «Йиз Дагъустан. Чру километрйир» кIуру эстафета Мягьячгъала шагьрин глава Салман Дадаевди тувну. Мициб акция учу шубубпи ражари вуди тешкил гъапIунча»,
– къайд гъапIну Хизри Абакаровди.
Дупну ккундуки, шагьрин главайи, жигьиларин тешкилатари, мектебариъ урхурайи баяр-шубари шагьрин паркарна кючйир, пляжар марцц апIбаз гизаф фикир тувра. Дурари гъизигу ва зигурайи зегьметнахьна гьюрматлувалиинди илтIикIури, ухьу мицдар серенжемариъ иштирак гъахьиш, жвуван хуларин улихь хьайи аьтрафар марцц дапIну, гьарар, рукар, кюкйир кивуз чалишмиш хьуз хъюгъиш, ихь шагьур йигълан-йигъаз уткан хьибди.
