Гьар йисан 22-пи декабриъ энергетикайин гъурулушдин гъуллугъчйири чпин машквар къайд апIури шулу.
22-пи декабриъ Табасаран райондин электросетарин идарайин гьяятдиъ энергетикдин Йигъаз тялукь вуйи шадлугънан серенжем кIули гъубшну. Дидиъ Табасаран райондин глава Мягьямед Къурбановра иштирак гъахьну. Дугъу райэлектросетдин гъуллугъчйир пишекарвалин машкврихъди мубарак гъапIнийи. «Энергетикарин ляхин гъийин девриъ варитIан лазимуб ву. Ичв албагну апIурайи ляхникан тешкилатарин ва идарйирин ляхин, зат хътадабтIди акв тувувал, гьарсаб хизандиъ манишин ва гъулайвал хьувал асиллу ву. Ичв ляхниз кьимат халкьди тувди. Дурариз учвкан ккунди айиб чпиз гьуркIну аквар тувувал, гьацира цIибди аквар ктIушвувал ву. Думу ляхин гюзчиваликк гъибтдича. Гъябгъюрайи йис вари гьюкуматдиз лап читинуб гъабхьну. Читинвалариз дилигди, райондиъ акварин ляхин ужу алапIбан бадали, учву хайлин зегьмет гъизигунчва. Узу учвуз жандин сагъ’вал ва ляхниъ заан хъуркьувалар ккун апIураза», – гъапнийи Мягьямед Къурбановди.
Ляхниъ заан хъуркьувалар гъазанмиш апIбаз лигну, энергетикдин Йигъахъди мубарак апIури, райондин главайи сасдар гъуллугъчйир гьюрматнан грамотйириинди, дипломариинди ва ччвурнахъан вуйи сяътариинди лишанлу гъапIну. Дурарин арайиъ слесарь Аьбдукерим Аьшурханов, механик Гьябиб Къазиаьгьмедов, электромонтер Гьясянбег Пашаев, электросетдин начальникдин заместитель Мурад Мирзамягьямедов айи. Хъа Табасаран РЭС-дин начальник Багьаудин ТIагьировдиз думу «Россети Кафари Кавказ» ПАО-йин гьюрматнан доскайик каъбан гьякьнаан му тешкилатдин генеральный директор Виталий Ивановдихьан вуйи шагьадатнама тувну.
Райэлектросетдин начальник Багьаудин ТIагьировдира чан гъуллугъчйир машкврихъди мубарак гъапI- ну. Дугъу 2020-пи йисан электросетди дапIнайи ляхнарикан ва цIийи йисаз вуйи планарикан ктибтну.
«Табасаран РЭС-дин ляхин цIийикIултIан гъурмиш апIбан бадали, 2023-пи йисазкьан вуйи проектар гьязур дапIнача, дурариз 2 йисандин арайиъ 160 000 000 манат харж апIиди. Дагъустан Республикайиз кьюд йисаз 3 миллиард манат деебтна, гьаддиз электросетдин линйириъ 200-210 В-тIан исина кьувват хьибдар. Табасаран ва Хив районариъ 16 000 муштарйирин игьтияжар гьуркIрача. 2020-пи йисан Дагъустан Республикайиъ электросетдин мяишатарин арайиъ ляхнин натижйириан сабпи йишв гъадабгъбаз лигну, энергетикдин Йигъаз бахш вуди, «Россети Кафари Кавказ» ПАО-йин терефнаан райондин ФЭС-диз 6 цIийи машинар тувну», – ктибтнийи райэлектросетарин кIулиъ айири.
Чан терефнаан Багьаудин ТIагьировдира ляхниъ заан хъуркьувалар гъазанмиш гъапIу саб жерге гъуллугъчйирра дипломарииндина грамотйириинди ва гьацира пулиинди лишанлу гъапIну.
