Улихьнаси республикайин мектебариъ урхурайидарин арайиъ кIули гъубшу республикайин дережайин олимпиадйириъ Табасаран райондиан вуйи ученикар гъалиб гъахьну. Гьаци, Хянягъ гъулан кьялан мектебдин 10-пи классдиъ урхурайи Саният Гьялимовайи дагъустан литературайиан олимпиадайиан 1-пи йишв гъадабгъну, хъа гьадму мектебдин 9-пи классдиъ урхурайи Муслимат Аьлиханова табасаран литературайиан олимпиадайиъ 1-пи йишван сагьиб гъахьну.
Къайд дапIну ккундуки, му мектебдиъ урхурайидар республикайин дережайин олимпиадйириъ хъади-хъади гъалиб шули, гьамус 6-пи йис ву. Му, гьелбетки, Хянгъярин кьялан мектебдин мялим Минатуллагь Аьбдуллаевдин хъуркьувал ву.
Му кIубан шубар ва дурарин мялим «Табасарандин нурар» газатдин терефнаан гъалибвалихъди тебрик апIурача. Гъит, дурариз хъанара заан хъуркьувалар ишри!
