Урусатдин Федерацияйин Правительствойи 2021-пи йисан бикарвализ тувру пособиейин варитIан заан ва варитIан асккан кьадар тяйин гъапIну – 12130 манат ва 1500 манат.

 

Ляхин адру сабпи шубуб вазли ватандашдиз улихьна чав лихури гъахьи йишваъ гъадабгъурайи маважибдин 75% тувди, амма думу кьадар 12130 манаттIан артухъ дубхьну ккундар, кьюбпи шубуб вазли – 60%, амма 5000 манаттIан артухъ дарди. Пенсияйиз удучIвайиз улихьна яшнаъ айи ватандашариз цIиб ярхи вахтнаъди пул тувди – маважибдин 45% дилихри сад йис хътабхъайизкьан.

2020-пи йисан мартдин вазлиъ бикарвалин пособиейин кьадар (8000 манат) 12130 манатдиина за гъапIнийи. Сифте кIул’ан думу, коронавирусдин инфекция тарабгъувалихъди, пандемия мялум апIувалихъди, гизаф ватандашар ляхин адарди гъузувалихъди аьлакьалу вуди, ляхин хътру ватандашарин яшайишдин тереф уьбхбан бадали, вахтназди адабгъу къарар вуйи.

Амма 2020-пи йисан пособиейин варитIан заан кьадар айиси гъибтуз къарар адабгънийи.