«Гъалибвалин чIал» ччвур тувну, Дагъустандин 100 йисандин юбилей къайд апIбаз бахш вуди, улихьнаси ФЛНКА-йин вакилари Кавказдин миллетарин багъри чIалариинди шиърар урхрударин арайиъ онлайн-конкурс мялум гъапIнийи.
Му конкурсдиъ саб жерге жара халкьарин вакиларин арайиъди табасаран ватанпервер живанарра иштирак гъахьну.
Натижайиъ Хиварин мектебдин 5-пи классдиъ урхурайи Тамерлан МутIалибов, Манаф Шамхаловдин «Снайпер Аьбдуллагь» шиир эсер апIруси дурхну, гъалибвалин 1-пи йишваз лайикь гъахьну.
– Узуз йиз багъри табасаран халкьдин милли меденият, йиз багъри чIал гьаммишан маракьлу ва багьа вузуз. Бабан чIалниинди шиърар урхбан конкурс мялум дапIнайиваликан гъеебхьиган, душваъ иштирак хьуз ниятра гъапIнийза. Гъалибчйирин жергйириъ учIвуз ният апIурайза, хъа гъалиб шлувалиин, гьелбетда, инанмиш дайза. Жюрийин вакилари ва тамашичйири узуз варитIан заан кьимат тувувалиин кьадарсуз шадра вуза. Му хъуркьувалик пай киву йиз абйир-бабариз, мялимдиз чухсагъул кIураза,
– гъапну Тамерланди.
Ихь набалугъ ватенпервер му хъуркьувалихъди тебрик апIури, дугъаз мюгькам сагъ’вал ва илимдин рякъюъ заан аьгъювалар ккун апIурхьа. Гъит Тамерландикан, уьмриъ халис инсан духьну, чан абйир-бабариз, чан бицIи Ватандиз даягъ ва дамагъ ишри!
Аьлава апIурза, Тамерлан МутIалибовди мектебдиъ заан аьгъюваларра улупура. Дидлан савайи, думу, райондин ДЮСШ-йиъ юкьяр дисбиин машгъул шули, швнуб-саб ражари талитарин гъалибчира духьна.
