Гьамусяаьт, вари уьлкейиъси, ихь республикайиъра мялуматарин дакьатарин вакиларин мелзниин алидар коронавирусдиз аькси вакцинайин рубар йивбакан улхбар ву.
Дидин гъаразнаъ духтрар ва гьюкмин вакиларра а, фицики ухьу аьзарлу гъахьиган, гьюкмарикра тахсрар кирчри, духтрарихьна жаргъури шулхьа, хъа сагъди айиган, гьапIуз-вуш духтрари кIуруб апIуз ккундархьуз. Агьалйирин вакцинайихьна вуйи фикрар ачухъ апIбан бадали, узу йиз гъуншдиъ айи инсанарихьна «Учву коронавирусдиз аькси вакцинайин руб йивуз планламиш апIуранчва?» суал хьади илтIикIунза. Дурарин жавабар жикъиди газатдин машнаъ чап апIурача.
Мурадхан, 55 йис:
– Гьелбетда, духтрариз чухсагъул дарпиди гъитуз шуладарзухьан. Узу гьаму улихьнаси коронавирусдиан аьзарлу гъахьунзу. Бедендин температура за гъабхьиган, телефондиан духтриз дих гъапIнийза. Духтир гъафнийи, анализар тувувал ккун гъапIнийи, дармнар гъидикIнийи. Кьюб гьяфтайин арайиъ кIурбар иццури, ил хътабгъувал гъагъиди, давление за шули, аман адарди гъахьунза. Гьамци аьзарлу хьайиз, вакцинайин руб йивувал ужу ву. Узуз сабан руб йивуз духтри ихтияр тувнадар, дарш гъи вушра гьязур вуза. Вахт улдубчIвиган, чарасуз руб йивидиза. Узу йиз хпириканра вакцинайин руб йивувал ккун апIураза.
Мягьямед, 19 йис:
– Узу вакцинайин руб йивбанди дарза, узуз узу аьзарлу гъахьнуш-гъахьундарш аьгъдарзуз. ТIягъюн мялум гъапIхъан мина кьюбан гриппсиб уьзур кубчIвунзук. Духтрарихьна гъушундарза. Саб ражари ниъ дяргъюри кьюб гьяфта гъабхьнийиз. Узу жигьил вуза, уьзриз аьксивал улупру кьувват йиз бедендиъ айивалик умуд кайиз.
Марина, 35 йис, кьюр бицIирин дада:
– Узу вакцинайин руб йивуз ният дапIназа. Гъубшу йисан хьадукран вахтна узу аьзарлу гъахьунзу, лап читинди алабхъунзуз. Хъана гьаци иццру хьуз ккундарзуз. Вакцинайи узуз кюмек тувур кIури, умуд кайиз.
Муслим, 44 йис:
– Узу вакцинайин руб йивувализ аькси вуза. Советарин Союздин вахтари вакцина адабгъруган, йисариинди ахтармиш апIури гъахьну. Хъа гьамус кIуруш, вакцина адабгъну гьацI йистIан дар, думу ахтармиш апIбаъ иштирак гъахьидарин кьадарра лап цIиб ву. Гьадму руб йивувал ккун апIура инсанарикан! Хъа, белки, узуз думу руб аьхиримжинуб шуйхьиб! Белки, йисарилан диди йиз бедендиз гъагъи зарарар тувуйхьиб! Дидкан гьеле духтрариз чпизкьан хабар адар. Гьаддиз узу узузра, йиз багахьлуйиризра вакцинайин рубар йивуз гъитидарза.
Саният, 22 йис, студент риш, волонтер:
– Узу вакцинайин руб гъивдарикан сар вуза. Руб дивну хъайигъан цIибди кIул иццру гъабхьнийиз, бедендин температура за гъабхьнийи. Думу йигъан хул’ан удучIвундарза, хъайигъан рягьят гъабхьнийиз. Гьамус вакцинайин кьюбпи руб йивуз имийиз. Эгер диди узу коронавирусдин уьзрихьан уьрхюруш, руб йивувалиин шад вуза.
