COVID-19 уьзриз аькси вакцинайин рубар…
Улихьна йигъари Табасаран райондин кьялан больницайиъ Табасаран райондин администрацияйин аппаратдин гъуллугъчйириз, райондин аьтрафариин ерлешмиш духьнайи федералин ва республикайин идарйирин кIулиъ айидариз коронавирусдин инфекцияйиз аькси вакцинайин рубар гъивну.
Коронавирусдин уьзрихьан уьрхру рубар гъивдарин арайиъ райондин глава Мягьямед Къурбанов, райондин депутатарин Собраниейин председатель Иса Исаев, Урусатдин Табасаран райондиъ айи ОМВД-йин начальник Насир Ягъибегов, райондин главайин заместителар Рамис Уьсманов, Заур Мусаев ва гьацдар жарадар айи.
«Гъуллугънан вазифйир тамам апIури, учу гьар йигъан аьхю кьадар инсанарихъди гюрюшмиш шулача. Жвуван ва багахьлуйирин, гъарашугъарин сагъламвал уьбхювал учуз важиблу вучуз. Ухьхьан аьдати уьмрихъна, улихьдинубсиб къайдайихъна вакцинайин рубар гъивиштIан гъюз хьибдар», – гъапну райондин главайи.
Табасаран райондин ЦРБ-йин кIулин духтир Абсередин Мирзабеговди къайд гъапIганси, руб йивуз разивал тувнайириз вакцинайин руб йивайиз улихьна, лабораторияйиъ ифдин анализ дапIну, дугъан бедендиъ уьзриз аьксивал улупру кьувват аш ахтармиш апIуру. Бедендиъ антитела айидариз ва сагъ апIуз читинди вуйи уьзрар кайидариз рубар йивурадар, сагъу инсанариз йивура. Вакцинайин руб гъюниз йивура, руб йивбан кьяляхъ дицир кас гьацI сяаьтнан вахтна духтрарин гюзчиваликк гъитра. Вакцинация кьюб пайнакан ибарат ву, 21 йигълан сабсана руб йивуру. Руб саризра гужниинди йивурадар.
Райондиъ сифтена-сифте вакцинайин рубар Табасаран ЦРБ-йин 50 духтриз гъивну. Рубар гъивдариз саб жюрейинра чIуру тясирлувал гъабхьундар. Табасаран райондин кьялан больницайиз вакцинайин 150 доза гъахну. Гъийин йигъаз 92 касдиз рубар гъивну.
Шиклиъ: Табасаран райондин глава М.Къурбановдиз COVID-19 уьзриз аькси вакцинайин руб йивура.
