COVID-19 уьзриз аькси вакцинайин рубар…

Мялум вуйиганси, гьаму йигъари республикайиъ, коронавирусдин уьзур терг апIбан бадали, дидиз аькси рубар йивбан серенжемар гъизгъинди кIули гъахура.

 

Республикайиъ гъягъюрайи гьяракатарин тереф дюбхну, февралин 3-пи йигъан Хив райондиъра улупнайи рубар йивуз гьязур вуйи 25 касди, лазим вуйи ахтармишар гъахбан бадали, ифи тувну. Улупнайи 25 кас асас вуди райондин гьюкмин кIулиъ айи вакилар ву.

Хив ЦРБ-йин кIулин духтир Агъамягьмад Нурмягьямедовди къайд гъапIганси, ифйир ахтармиш апIуз Мягьячгъалайиз гъахиди. Ахтармишарин жавабариз асас вуди, руб йивбаз манигъ’вал адру касариз думу рубар йивиди. Коронавирусдин уьзрихьан уьрхбан метлеб ади, дурариз шубуб гьяфтайилан сабсан руб йивиди.

Руб йивайиз улихьна аьлавади гьарсар касдин бедендин температура, дурарик саб жерге жара уьзрар каш-ктаршра ахтармишар гъахиди.

– Коронавирусдиз аькси антитела бедендиъ аш, ахтармишариз ифи учу райондин ЦРБ-йиъ гъадабгъурача. Гьелбетда, вари гьяракатар пулсуздар ву.

Хъа ЦРБ-йиъ улупнайи вакцина лазим вуйи саягъниинди уьбхбаз шартIар адрувал гьисабназ гъадабгъну, рубар йивбан юкьуб район сатIи апIурайи пункт Касумкентдин ЦРБ-йиъ гьяракатнаъ а. Хив райондин руб йивбаз ихтияр айи ватандашарира коронавирусдиз аькси рубар гьадушваъ йивиди.

Райондин жямяаьтлугъдихьна илтIикIури, къайд апIурза: саб жерге гъизгъинвалиинди яркьу апIурайи кучIлин хабрарин лукIар махьанай! Фунуб уьзрихьанра агьалйир лазим дережайиъди вакцинация гъабхували уьрхюру. Коронавирусдиз аькси рубарра уьзур яваш апIбан метлеб ади йивурайидар ву. Ватандаш’валин тереф дюбхну, жвуван, жвуван багъри касарин сагъламвал ва уьмур уьбхбаъ жавабдарвал гьисс апIинай, – гъапну А. Нурмягьмедовди.

 

Шиклиъ: Хив райондин глава Я.Ярметовди тялукь ахтармиш апIуз ифи тувра.