Улихьна йигъари гъабхьи Хив райондин администрацияйин коллегияйин заседаниейин дахилнаъди дидин иштиракчйир райондин ОМВД-йин вакилари ккудубшу йисан тамам гъапIу ляхнин натижйириз гъилигну.

 

 

Серенжем ачмиш апIури, райондин глава Ярмет Ярметовди гъапиганси, йишвариин гьюкум тешкил ва тамам апIурайи вакиларин ляхниъ ерли йишвариин къайда ва хатIасузвал уьбхбан месэлйири асас йишв бисура.

Асас улхуб райондин аьтрафариин саламатвал уьбхбан важиблуваликан вуйивализ лигну, Хив ОМВД-йин начальникдин вазифйир тамам апIурайи полицияйин майор Рамазан Селимхановди заседаниейин иштиракчйир полицияйин гъуллугъчйири му жигьатнаан 2020-пи йисан гъубху ляхнин натижйирихъди таниш гъапIнийи.

 

– Хив райондин сяргьятариин къанунар ва къайда уьбхбан гъаразнаъ ади ва Урусатдин «Полицияйин гьякьнаан» къанундиз асас вуди, учу йишвариин саб жерге уьлчмйир кьабул дапIнача. Ляхнин асас метлебра – агьалйириз хатIасузвал яратмиш апIувал ва думу уьбхювал, йишвариин жямяаьтлугъдинна полицияйин гъуллугъчйирин аьлакьйир мюгькам дапIну, арайиъ ихтибарвал за апIувал ву.

Полицияйин вакилари агьалйирин хатIасузвал мюгькам, тахсиркарвалар кам апIбан метлебниинди кIули гъуху серенжемарин натижайиъ, вари уьлкейин гьякьикьатдихь тевиш, улупнайи вахтна Хив райондиъ хатIасузвалин аьгьвалат саламатди уьбхюз мумкинвал дубхьна.

Гьаци, ккудубшу йисан Хив райондиъ 53 тахсиркарвал гьисабназ гъадагъна. Дурарин кьадар улхьан йисантIан 24%-дин камди ву. Ашкар дапIну, гьисабназ гъадагънайи тахсиркарваларин кьадар кам дубхьнайивали айтIан ляхнариз лигру гъуллугъчйири йишвариин гъабхурайи гъаврикк ккаъбан ляхнин натижалувал субут апIура. Амма, мидихъди сабси, райондиъ арайиз гъюрайи саб жерге аьлава тахсиркарвалар ачухъ апIбан жигьатнаан уьлчмйир жанлу апIбан чарасузваликанра кIваълан гьархну ккундар, – гъапну Рамазан Селимхановди.

Къайд апIурза, къанунарна къайда уьрхбаъ, йишвариин саламатвал яратмиш апIбаъ жавабдар гъуллугъарин улихь экстремизмдиз ва терроризмдиз аькси ляхин гъабхбан месэлйир варитIан важиблударди гъузра.

Рамазан Селимхановди чан улхбаъ гъапиганси, 2020-пи йисан Хив райондиъ терроризмдин лишнар кайи тахсиркарвалар гьисабназ гъадагънадар.
Му жигьатнаан аьгьвалат гюзчиваликк уьбхбан бадали, полицияйин гъуллугъчйири йишвариин гьюкум тешкил апIурайи касарихъди, жямяаьтлугъ вакиларихъди сигъ аьлакьйир уьрхюра.

Йишвариин хатIасузвал яратмиш апIбан, къанунар уьрхбан гъаразнаъ ади, улупнайи муддатнаъ Дагъустандиъ гъахурайи гьяракатарин бинайиинди Хив ОМВД-йин вакилари райондин ругариин уьмуми метлеб айи хайлин серенжемар кIули духна. Гьадму гьисабнаан «Хушниинди яракь тув», «Пяпякьян», «Розыск», «Профилактика», «Фикир тувай, бицIидар!», «Ички ишлетмиш апIбиин гюзчивал», «Автобус» ва хайлин жара серенжемар улупуз шулу.

– Аьхиримжи вахтна республикайиъ лутивалин тахсиркарвалар апIувал гъизгъин дубхьна. Асас вуди тахсиркрари инсанарин банкарин картйирилан пулин дакьатар икI апIура. Му жигьатнаан учу агьалйирихъди сикин дарди гъаврикк ккаъбан ляхин гъабхурача. Текрар шулза: тялукь касарихьан ихтият йихьай, ичв гъазанжар уьрхяй!

Аьлава апIурза: тахсиркарвалар ачухъ апIбалан савайи, ккудубшу йисан учу агьалйирин жюрбежюр месэлйириан 192 аьрзара гьял дапIнача. Йисан аьхирариз Хив ОМВД-йин профилактика гъабхбан гьисабназ 44 кас (асас вуди хизанариъ гъалмагъал ипрайидар, наркоманар, пиянискйир) гъадагъна. Гъулариъ гьякьикьат гюзчиваликк уьбхбан метлеб ади 4032 хизан ахтармиш дапIнача.

Райондиъ административвалин 1093 жюрбежюр тахсиркарвалар арайиз гъахи ватандашарин гьякьнаанра тялукь уьлчмйир кьабул дапIна.
Рякъяриин хатIасузвал уьбхбан жигьатнаан ляхин гъабхура, амма му улупбари рази апIурадар: 2020-пи йисан райондиъ 4 ДТП гьисабназ гъадагъна. Бахтнаанси, гъийихдар адар, – давам гъапIну дугъу.

Улупнайи месэла гьял апIури, серенжемдиъ Хив райондин глава Ярмет Ярметов ва саб жерге гъуларин поселенйирин главйирра удучIвну гъулхну. Дурарикан гьарсари улупнайи месэлайин гьякьнаан аьгьвалат пучIу апIуз диш дапIнайи хусуси теклифарра арайиз адагъну.