Улубкьнайи 2021-пи йис Дагъустандиъ ДАССР арайиз гъафихъан мина 100 йис тамам хьувалин лишниккди кIули гъябгъиди. Республикайиъ кIулди вари йисан гъахру серенжемарин яркьу планра тартиб дапIна.
Дупну ккундуки, ихь республикайин юбилей къайд апIбак Урусатдин хайлин регионарин шагьрари чпин пайра кивра. Магьа гьаму йигъари Санкт-Петербург шагьрин халкьдин яратмишарин ва рягьятвал гъадабгъру Хулан концертар гъахру залиъ, Дагъустан арайиз дуфну 100 йис тамам хьпан юбилейиз бахш вуди, “Эй, Дагъустан, яв ччвур адлу апIурза!” лишниккди серенжем кIули гъубшну. Дидин тешкилатчйир Санкт-Петербургдиъ айи РД-йин вакилвалин тешкилат, Дагъустандин жигьиларин тешкилат ва Санкт-Петербург шагьрин культурайин Комитет вуйи.
Серенжемдиз дуфнайи хялариз, концертдин программа ккебгъайиз улихьна, халкьдин сяняаьткарвалин устадарин “Дагъустандин багьалу савкьатар” выставкайиъра иштирак хьуз мумкинвал гъабхьну. Дагъустандин юбилей къайд апIбан шадлугънан серенжемариз Санкт-Петербургдин администрацияйин вакилар, Санкт-Петербургдиъ айи Кафари Кавказдин республикйирин ва Урусатдин жара регионарин вакилвалин тешкилатарин кIулиъ айидар ва хайлин жара хялар дуфнайи.
Серенжем ачмиш апIури, Санкт-Петербургдиъ ерлешмиш дубхьнайи РД-йин вакилвалин тешкилатдин кIулиъ айи Гьясан Гьясановди къайд гъапIганси, Дагъустан – успагьи табиаьтдин ва уткан дагъларин республикаси, Урусатдин варитIан гизаф жюрбежюр миллетар аьсрариинди чвйирси саб йишв’ин саламатди яшамиш шулайи макан ву. Думу дирбаш игитарин, гьунарлу ватанперверарин, машгьур аьлимарин, баркаллу зегьметкешарин, бажаранлу духтрарин ва мялимарин, культурайинна искуствойин лайикьлу вакиларин, сарихьанра ккагъуз даршлу спортсменарин ватан ву.
“100 йис – му лап важиблу кьадарнан вахтси гьисаб шула. Му саб аьсир ву. Гьаму муддатнаъ ихь республикайиз варитIан ужуб вахт ва пешкеш гъабхьиганси советарин девир гьисаб апIураза, фицики иллагьки гьадму вахтна Дагъустандин артмиш’вал улихь гъябгъюз хъюбгънийи. Гъи узуз гьаму серенжемдиз дуфнайи хялариз чухсагъул пуз ва, республикайин машквар тебрик апIури, гьарсар ватандашдиз хушбахтлувал, ислягьвал, сагъ’вал ккун апIуз ккундузуз. Гъийин концертдиинди юбилейин серенжемар ккудукIидар. Учу гъябгъюрайи йисан Санкт-Петербургдиъ Дагъустандин Главайин ччвурнахъан швнуб-саб серенжем гъахуз планламиш дапIнача. Санкт-Петербургдин агьалйирихъди сатIиди ухьу дурар хъуркьувалиинди кIули гъахрувалик миж кайиз”,
– гъапну Гьясан Гьясановди.
“Йиз фикриинди, Урусатдиъ Дагъустан ихь уьлкейин дахилнаъ айи республика вуйиваликан хабар адру сар касра хьуб мумкин дар. Гьарсар касдиз Дагъустан чан хусуси мани гьиссариинди багьа ву. Шлиз-вуш дагълар кьабулди ву, тмунуриз – дагъустанлуйирин хяларихьна вуйи гьюрмат, шубурпириз – коньяк… Хъа варитIан асасуб ва важиблуб – Дагъустан рягьимлу, гьюрмат-хатур апIру, кюмекназ гъюру инсанар айивалиинди, дугъри ватанперверариинди лишанлу шула. Узу вари дагъустанлуйир юбилейихъди тебрик апIураза”, – къайд гъапIнийи Санкт-Петербург шагьрин миллетарин Хулан директор Валерий Николаевди чан удучIвну улхбаъ.
Му йигъан серенжем концертдин программайиинди ккудубкIну. Концертдиъ Санкт-Петербург шагьрин культурайинна рягьятвал гъадабгъру милли идарйирин художествойин коллективар иштирак гъахьнийи.
